日前楊受成旗下雜誌刊登了大劉劉鑾雄新女友的大肚相，又暗示大劉送樓給女友及公司愛將，昨日楊受成出席新城電台的台慶慶祝酒會，問他有否致電劉鑾雄，他說：「冇，我𠵱家喺度祝福佢。」
劉鑾雄指摘有人爆料給某周刊，楊受成說：「我唔知佢講邊間，亦唔知佢話邊個。」問楊受成他旗下雜誌的報道會否影響他與富豪朋友的關係？他說：「完全冇，做生意嘅人都會了解雜誌運作，會體諒。」
而大劉昨日則回應說：「佢（楊受成）祝福我，我都多謝佢。佢話唔知我講邊本雜誌，我亦冇講過係邊本雜誌，相信傳媒工作者都識分，知道事實係點。對住記者，我相信佢唔會擘大眼講大話，亦希望記者同我一齊，支持佢講嘢嘅說服力啦！」
採訪：胡比、李珮洳
攝影：陳偉權、黃文成