彭羚、楊天經、河國榮、向小喬同鮑起靜等，前晚喺灣仔演藝學院為《但願人長久鄧麗君》傳奇音樂劇演出。
前晚亦都係農曆七月十四嘅「盂蘭節」（即係鬼節），一班演員喺演出前都誠心上香，祈求演出順利。不過惟獨係河國榮唔信邪，佢咁多場演出都冇拜過神。
彭羚演鄧麗君，而河國榮就演鄧麗君生前嘅法籍男友，兩位拍檔又唱又跳，都幾合拍。
而陳寶珠因為個仔楊天經有份演出，扮演鄧麗君嘅大馬男友，所以幾乎每晚都去後台探班。楊天經話：「媽咪每晚都送湯水嚟畀我，佢做咗我以前服侍佢做舞台劇嘅嘢，我哋對調咗身份。」
當陳寶珠等埋楊天經離場時，陳寶珠嘅影迷愛屋及烏，猛叫佢兩母子喺場刊度簽名。
甄妮前晚喺台灣開演唱會時，唱到歌曲《酒干倘賣無》，突然失聲哽咽，並向全場觀眾解釋原因，原來佢啱啱知道母親喺美國不幸因車禍過身。
甄妮阿媽同家姐住喺美國亞特蘭大，本周一（十九日）甄妮返到台灣後幾個鐘，佢阿媽喺美國揸車去超級市場途中遇車禍。
孫燕姿噚日接受新城電台節目《聯Fan所》嘅訪問，佢話全新個人專輯喺大中華地區銷量已達八十萬張，所以特別買咗一隻鑽石戒指獎勵自己，但就唔肯透露價錢。早排孫燕姿出席咗新加坡國慶表演，佢噚日話：「當日喺六萬多名觀眾面前表演，真係好緊張。」
周立璟同女友AnaR.雖然拍咗拖一排，但每次見到記者都好似見到鬼咁彈開。前日周立璟就同女友AnaR.喺港島嘅香格里拉酒店出現，佢哋入去嗰陣，特登分開前後腳，當記者上前影相時，佢哋重即刻彈開，好避忌。不過我馮仁昭就認為，拍拖咪拍拖囉，唔可以大方啲咩？
陳司翰（Victor）最近出咗國語新碟，下個月又要去台灣開音樂會，Victor話唱片公司EMI同佢講，如果新碟賣過一萬張就有嘢獎，獎乜？Victor話：「就係獎我可以除衫喎，賣多一張就除一件衫，我梗係唔制，最多除鞋咋。」最近EMI似乎力谷Cookies同Shine，不過Victor話唔會呷醋喎。
陳見飛噚日應新城《聯Fan所》節目邀請，去咗灣仔合和中心一間酒家示範煮嘢食。陳見飛話佢好怕油煙，而且𠵱家屋企個爐好難開，所以不嬲好少煮嘢食喎。早前有人話陳見飛老竇陳澤民送咗三十萬宣傳費畀佢做生日禮物，佢就話老竇未送嘢畀佢，反而細佬陳冠希就買咗好多衫送畀佢喎。
八両金最近發展內地市場，努力賺錢，佢噚日出席記招時話：「我喺香港冇市場，但係內地我都受歡迎。我識到有幾個老細好闊綽，佢哋賭波閒閒哋一場都輸一、二百萬，咁我咪叫佢哋不如投資拍戲囉，我應該年尾就會開戲自己拍。」八両金堅決唔破產，努力還債，重希望一家團聚。
無綫推出全新勵志節目《開心見城》，羅慧娟有份做節目主持，而最近佢有份主演嘅《蓋世豪俠》再次重播，娟妹話：「好開心，我都知重播過幾次，不過都係因為周生啫！」朱茵早排話憎恨舊男友，問娟妹有冇同感，佢話：「我比朱茵幸福，分手後先知道佢花心，不過過咗咁耐，唔會憎佢。」