講到賽車Game相信無人不認同《GT3》嘅王者地位，其他廠商欲分一杯羹，在創意及玩法上必須與別不同，一向擅長格鬥遊戲嘅CAPCOM就深明箇中道理，新出嘅《automodellista》不但在畫風上嚟個大突破，而且重加入大量連《GT3》都欠缺嘅新玩法，相信在暑假檔期尾都能令玩家再一次掏腰包。
記者：徐影龍
當初CAPCOM宣布開發《automodellista》時，一眾玩家已被其卡通畫風所吸引，因為市面上賽車Game嚟嚟去去都係鬥真實同車多，新意欠奉，而呢隻《automodellista》以卡通形式表達，加上如漫畫般嘅極速風位效果同片彎爆風，淨係新鮮感已經攞滿分，而且亦設有三種視點轉換、觀看後車等功能，Replay時更可選擇快鏡、定格及倒帶等，整體嚟講可令遊戲生色不少。
遊戲目的並非純粹砌贏對手咁簡單，係要組成車隊遠征日本各地，達到全日本制霸目的，當中包括阪神高速環狀線、赤城下坡道、群馬縣等，十分有漫畫《頭文字D》Feel。
近年賽車遊戲已經不離改裝車玩法，《automodellista》都唔例外，而且重將之發揚光大，遊戲內不但設有多款改裝零件，而且重可改變車身外觀，如將各部份噴上唔同顏色、貼上種種車花甚至自行設計車身貼紙都得，組隊後不妨設計一個獨一無二嘅車隊Logo，投入感即時大增。
另一特色係加入車房嘅玩法，不但設有三種唔同風格嘅車房環境供玩家揀選，而且重可以為自己車房加入各式海報、油桶、工具箱作布置等，雖然並無實際用途，不過相信玩家會好樂意將心愛車房粉飾一番。
車款數量眾多亦係《automodellista》特色之一，遊戲內連隱藏車款亦數量眾多，遊戲內連隱藏車廠達十一間，每間車廠平均超過十款車，有排先玩得晒，而且每款隱藏車及零件，都須達到某項遊戲進度先可開啟，計埋先前提到嘅車房改裝，閒閒哋有過百件隱藏物件等你發掘，想儲齊相信都要花一段時間先得，幸好在「RACE」模式內Level1攞到一次冠軍，已可獲得新車及多項隱藏物件，相信更高級車種及物件需要挑戰更高Level，玩家更有興趣花時間奪取好成績，令遊戲壽命大大加長。
為進一步催谷呢隻《automodellista》，CAPCOMASIA送出一百張大海報畀《蘋果日報》嘅讀者，只需憑今日《打機樂園》版，便可到DreamStore免費換取《automodellista》大海報一張，先到先得，送完即止。
DreamStore
地址：灣仔東方188商場256號舖
電話：25753285
對應機種：PS2
遊戲類型：RAC
開發商：CAPCOM
價錢：約$398
(c)CAPCOMCO.,LTD.2002ALLRightsReserved.
記者意見
抵讚：畫面表達有新鮮感，大量隱藏元素夠晒玩。
要彈：Load碟次數頻密、操作需時適應、香港不可網上對戰等。