新相識朋友白水泉（此乃古老講法，阿全叫做人王全，阿泉就叫白水泉）約食晚飯，傾下閒偈，白水泉做事多年，身經百戰，深諳為下屬之道，亦透過老闆關係，認識不少老世家、新發財、暴發戶。此晚，左丁山早到，先接到公關小YY電話：「咁咁咁！」左丁山問佢：「七點幾咯喎，重未放工？」小YY即刻發難：「唔使做咩，我日以繼夜，幾乎日日做足十二粒鐘嘅啦！」
小YY出道未幾，就咁搏命，重係火氣十足，年輕人就有此精力。繼而白水泉趕到，睇佢個疲倦樣，又係好似做到「日以繼夜」噃。想起董特首最近在工聯會嘅吐苦水大會，拍枱講：「我會日以繼夜工作……直至經濟轉好……」，香港人其實已經搏晒命，做工做到日以繼夜，邊會偷懶呀。
白水泉閱歷豐富，飲咗杯茶，順番條氣就講：「花生總統卡達日以繼夜咁工作，列根總統日日五點放工，成日放假返加州，你話邊個總統醒啲呢？九十年代嘅管理口號係WorkSmart，唔係WorkHard，𠵱家講番轉頭，有乜用。低增值製造業講求日以繼夜嘅工作，知識型經濟唔係啦啩，最緊要醒頭醒腦，領導人尤其如此。老實講，九七年，你買咗一幅貴地，現在日以繼夜咁工作，都係要蝕本，當時你識得賣本港樓，買倫敦樓，𠵱家日以繼夜去打波啦，講真，領導人最緊要識睇形勢，有策略，如果佢要日以繼夜工作，我哋平民做二十四小時都未必掂。」佢並非鼓吹炒賣，好食懶飛，只係感嘆領導人同普通市民咁用手唔用腦啫。