遊戲界一向喜歡以藝能界名人擔大旗做遊戲主角，由Puffy、金城武到濱崎步已屢見不鮮，最新被推向3D立體化嘅係有性感女神之稱嘅藤原紀香，不過遊戲並非賣弄紀香靚樣同身材，而係硬橋硬馬嘅戰爭動作遊戲！
呢隻掛正藤原紀香牌頭嘅《PROJECTMINERVA》，以動作戰略玩法為主，遊戲中紀香擔任特殊部隊總司令，指揮一隊三人部下四出作戰，不過敵人卻是高科技產物嘅人造人，兼且擁有雷達亦探測唔到嘅能力，故此玩家須打醒十二分精神，以雷達配合肉眼作「索敵」，再逐一擊破。遊戲中紀香設有HP、攻擊力、防禦力及索敵能力等多項數值，以每項任務完成度而提升。
遊戲中除深入敵陣，殲滅人造人外，另有拯救人質、調查敵陣，甚至炸彈處理等任務，各項任務完成條件亦不盡相同，加上機關槍、狙擊槍及手榴彈等多款武器登場，玩法尚算多變有趣，要注意係擊倒敵人後便可獲得一定數量TP，作升級武器及購買其他裝備之用。
對應機種：PS2
遊戲類型：動作＋戰略
開發商：D3PUBLISHER
價錢：$342(特別版$585)
(c)2001-2002D3PUBLISHER/TAITO/IMJ/FLAT-OUT/MEDIAFACTORY