如果閣下係一個追求健康飲食嘅人士，咁小記今日要介紹嘅呢間正舖就絕對啱閣下要求。我所講嘅係原名青瓜雜誌嘅正食字號，九五年正式開始銷售代理日本自然食品系列，賣嘅食品以不含人造色素、防腐劑為主，以有機、無代糖取替，令大家可以食得更放心。以下係小記嘅精選推介，其中有部份重係日本皇室御用食品，想試吓連皇室都指定要用嘅食品，就要到此逛逛。
記者：陳冰麗
攝影：周旭文
Model：Danielle
日本皇室御用食品
有咗呢啲一包包嘅豆乳，想喺屋企自製滑嘟嘟嘅豆腐話咁易，重唔使雪，毋須加石膏，豆腐都可成形㖭！神奇之處就係靠附送嘅一包透明液體，佢就係天然豆腐凝固劑叫Nigari。
製作過程好簡單，只要將原袋豆乳放入滾水內滾約5-6分鐘，然後將加熱咗嘅豆乳倒出，加入Nigari，再順方向攪拌5下，豆乳即凝固，質感有如布甸，可淋上糖漿甜食或加醬油作為鹹食又得。其營養豐富，成份天然，小朋友或老人家最啱食。
神泉乃東京琦玉縣最北嘅一個小村，因該處嘅水質滲透率與細胞液及血液相近，有助溶解及帶走體內多餘廢物，加速新陳代謝。日皇睇中該地水質，於是頒發「御用藏」畀一間Yamaki公司獨家監製，以後神泉水就成為日本皇室御用飲料，至今已有百多年歷史。
呢款醬油成份包括有神泉水，其餘有海鹽、有機大豆、小麥等成份，經三年以木桶雙重釀造，令醬油味更濃郁及香醇，呢款醬油絕不含防腐劑，所以建議使用過後宜放入雪櫃。
日本認為適量呷醋，對腸胃有益，所以醋幾乎係佢哋必需品。紅梅醋係用有機紅梅、海鹽及神泉水煉製而成，不含人造色素或防腐劑成份。食滯或飲醉酒，以開水調和適量有機紅梅醋飲用，有助消化或解酒，平時飲少少亦有益健康。
健康飲料
呢款有機豆奶豆味濃郁，不含糖份，老人家或糖尿病患者都啱飲，最特別係成份除咗有機黃豆、海鹽、神泉水之外，重加入昆布、麥芽、薏米，令味道更香。有機豆奶喺日本非常暢銷，聽講遲吓日本更會註冊為專利權，到時有可能搶高價錢。每盒一公升裝，熱量低，不含膽固醇，女士更可作為KeepFit健康飲料。
呢三款都係正食字號最新飲料，全部均由日本入口。紫蘇梅汁係取紀州盛產嘅青梅所做，有消暑、助消化功效；綠茶則係取靜岡嘅綠茶葉製成，清香味道，夠解渴。至於橙乳酪豆漿係以自己公司Marusan盛產嘅豆奶所做成，味道濃郁，只係多咗橙香嘅味道，感覺清新，一試無妨。
原產地日本嘅有機木立蘆薈，獲日本JAS有機認證。百分百自然榨取嘅蘆薈汁均無添加任何防腐劑、代糖、人造色素或酸鹼調整劑等。木立蘆薈汁味帶苦，原因就係木立蘆薈保留蘆薈素及蘆薈瀉素成份，所以帶有苦味，但原來呢種帶苦嘅成份有促進腸胃功能，有助通便，甚至有消炎殺菌作用。
零食推介
三種味道脆片均採用原材料有機綠豆、糯米、大豆等做成，三款可口脆片均屬健康零食，唔同一般薯片或脆片，製作方法以高壓焗製，而不經油炸，所以脆片不含油脂，食落絕不有油膩感，香脆可口，大可以放心畀小朋友食，作為送酒小食，更加係新配搭，更有益健康。
昆布甜甜係一款軟糖，以昆布、麥芽、薏米、糖漿、三溫糖等所製成，成份都好有益，送畀小朋友食都唔怕，而且加有昆布成份，重可以彌補平時因唔食昆布而缺乏嘅碘質。木立蘆薈糖都係健康之選，因加入咗麥芽糖漿、三溫糖及沖繩出名嘅黑糖，食落就無咁苦。
其他精選
日本人嘅甜菜即蘿蔔，呢種以甜菜根做成嘅砂糖，係北海道特產，加有蜜糖成份，砂糖中含乳酸良菌及善玉菌，特別對腸胃有益。呢種菜糖甜而帶清香，可直接加入飲品內拌飲，亦可作為煮餸調味料，比用白砂糖更有益。
玄米即糙米，糙米營養豐富，含多過四十多種維他命及無機礦物質，有助平衡身體、加速新陳代謝等。超微玄米粉末係日本人利用遠紅外線以高溫將糙米煎焙成只有15-25微米(0.015-0.025mm)之超細粉末，以保留糙米之原有營養、原色及原味，但食起嚟就更為方便。有白、啡兩種玄米粉末，可直接沖水飲、做糕點、炸粉、芡汁等。
店舖：正食字號
分店：旺角新世紀廣場139A
查詢電話：26289789
小貼士：買滿$200更可即時入會，日後即享有會員優惠價購物，折扣由九五折至八五折不等。