前日有位林以軒小朋友創咗最快計數世界紀錄，噚日董太想有樣學樣。不過，呢次佢參與保良局搞嘅「巨型剪紙挑戰世界紀錄」，蝦碌笑料連場，唔知健力士會唔會承認呢？
話說呢個全長百六呎、闊八呎嘅巨型剪紙，由多張剪紙拼貼而成，剪成一朵朵蓮花圖案，望落都幾有氣勢，大家都冇諗到底座竟係由輕飄飄嘅發泡膠支撐。
儀式開始時，原本應該由董太同郭富城填滿專登預留嘅剪紙空位，以示新嘅世界紀錄正式誕生。不料，「災難」就發生於呢一刻。記者爭相楔位影相，有記者忽然想企喺剪紙對面，又唔想行得太遠，一腳踩落巨型剪紙上面。「嘭」一聲，尚未誕生嘅「世界紀錄」就咁穿咗個大窿。
董太城城對住「穿窿世界紀錄」雖然一臉無奈，都盡責巡視影相。董太重失驚無神捉住幾個啱啱落機嘅外國遊客介紹剪紙。點知行到另一頭，影影吓相又有記者踩爆剪紙，董太見到都眼冤。
不過，董太同城城就好啱傾，佢學過日文，聽到城城啱啱去完日本開演唱會，即席同城城表演日文對答。但記者事後分別問佢哋講咗啲乜，兩個都好似唔多明對方嘅日文，董太連自己講咗句乜日文都說不出個所以然。看來佢要上多幾堂先掂。
傳真︰2623-9278
電郵︰