大市跌唔落，恒指有21點進帳，個勢仍然向上，雖則幅度唔適宜有太大期望。
新地（016）推售珀麗灣，接獲認購用萬做單位，認真墟冚，對股價應有多少刺激。新地收55元，升1格。不妨搵啲新地Call輪小敲。短炒對象係隻9253，收32仙，升1格，溢價2.1%，槓桿率17.2倍，溢價咁低（同其他同類輪比較），皆因快到期，下月9日夠鐘。
新地Call輪交投最活躍嘅係9371，昨日企定喺26.5仙，有32球易手，槓桿率20.8倍，有咁大爆炸力，12月中至到期，自然有高啲溢價，達13.9%。凡係高溢價高槓桿率嘅窩輪，炒賣之時至緊要快手快腳，切忌坐盤坐得太耐。現價上車，31仙以上散水。
新樓盤好賣（雖然個別係蝕本貨），恒地（012）亦都會得益。恒地昨收27.40元，升5仙。
搵恒地Call輪埋手，有9272同9473兩件。正路對象係9473，現價33.5仙，溢價10.3%，槓桿率8.2倍，明年3月到期，大把時間。9272係仙輪，收6.2仙，明年1月到期，溢價27.1%，槓桿率44.2倍，呢件上落快，做短線冇問題，賭幾個月，作廢機會大過唔作廢。
章盛