市場噚日觀望長實（001）和黃（013）業績，大市表現牛皮，恒指收10424，升21點，成交51.61億元。
和黃今次公布中期業績，純利只倒退17%，叫做好過市場預期，不過佢今次並冇為Vodafone及德國電訊111億元減值撥備入落損益表內，因此業績是否真係好過預期，大家應該心裏有數。
不過，和黃突然宣布斥資逾百億元收購歐洲第3大零售集團，目的係想藉此擴大3G零售網絡，此舉可能會令分析員進一步睇好佢嘅3G前景。
噚日民企又開始發威，歐亞農業（932）勁升15.3%，收1.13元，而且有近億元成交配合，絕對唔係搭棚咁行貨。阿虎四圍撲料，收到嘅線報係有中資熱錢流入炒民企。至於係咪要為新一輪民企上市集資熱潮造勢就不得而知，不過呢批熱錢應該未出手，歐亞噚日升勢未必同呢批資金流入有關。
最近歐亞傾緊引入伊藤忠商事做策略性股東，伊藤忠商事早前同歐亞訂立蔬菜出口協議，成為合作夥伴。日本仔做得歐亞合作夥伴，入埋股都唔奇。
華南實業（554）宣布配股後，股價急升28.5%，收3.15元，成交276萬元。公司透過嘉華金融，按每股0.23元配售1.65億新股，集資3795萬元。不過有關配售尚未完成，嘉華金融會按盡力基準配售。
華南實業成交一向薄弱，若要成功配售，非要將股價托高不可，等承配人有一定的走貨空間。
衝浪平台（8178）下周請芬佬返內地考察，唔知係咪有好料爆，噚日股急升14.8%，成交達1179萬元。
阿虎