蘇格蘭前日主場輸畀丹麥○比一，係領隊福士執教半年來六場比賽第五場輸波，如果唔計早排贏港隊四比○，五場對世界盃決賽周球隊都輸晒，認真丟架，亦都證明福士似乎唔多適合教蘇格蘭波喎。
輸波都算嘞，福士賽後重怪責班球員心理質素唔夠，好多嘢要改云云。查實球員唔掂，領隊更加要負責。查實當初我求大俠聽見呢個德國佬教蘇格蘭都打個突，德國戰術性強嘅足球，同粗枝大葉嘅蘇格蘭波格格不入。蘇格蘭如果再輸多幾場，福士自己要醒扒啦。
可能因為意大利響世界盃發生太多執法爭議事件，連前日對斯洛文尼亞場友賽，奧地利球證布加都成為焦點。或者壓力大關係，佢誤將艾辛莫域罰出場（以為佢兩黃變一紅），後來至發覺原來艾辛莫域之前冇攞黃牌，只好樣衰衰咁叫番佢入場。始終係友賽啫，唔使咁緊張啩。
馬田因為冇參加列斯嘅季前集訓，搞到俾領隊雲拿保斯貶咗做後備，但佢老人家死撐話對當日嘅決定冇感到後悔，重話有信心搶番個正選位番嚟。講真吖，如果佢肯認低威嘅話，雲拿保斯可能會放佢一馬，之不過佢𠵱家咁講，睇怕真係冇彎轉嘞。
噚日香港一間銀行，首次以英超球隊利物浦為噱頭推出信用卡，我求大俠當然唔執輸，到記者會湊湊熱鬧。今次信用卡推廣除咗豁免首三年年費外，成功申請重可以加九十八蚊換個限量版嘅奧雲公仔。如果你係利物浦球迷嘅話，我求大俠認為呢張卡都幾值得申請，因為今次話晒係英格蘭當地以外，唯一一張利物浦信用卡，就算申請嚟冇乜用途，免費申請番張都幾有紀念價值。