大家都唔睇好招標反應嘅市建局西環加惠民道項目，噚日截標前個多小時，居然有6家發展商陸續入標，搞到蘭西同老記都以為跌眼鏡。點知市建局最後出稿，話只係收到4份標書，大家當堂呆咗一呆，以為市建局搞錯。
追問之下，市建局話，原來有兩家只係嚟交感謝信，就市建局邀請佢地參與競投而表示衷心感謝喎。呢兩家發展商就係保華地產同威新集團。
蘭西問過啲發展商，佢哋話禮貌上都應該咁做，無乜出奇。但奇就奇在，兩家發展商居然揀截標日至交感謝信，重要將信放入投標箱，蘭西過往都未見過。
假如個個唔入標嘅發展商都嚟呢一招，做截標新聞嘅記者第日要做多好多工夫，先搵得番邊啲真正有入標。
房屋署宣布調低居屋入息上限，由兩萬一減到兩萬，但利嘉閣話，其實喺私樓市場都有唔少選擇，例如粉嶺中心同天水圍嘉湖山莊嘅單位，月入兩萬嘅家庭都供得起，只係佔家庭收入嘅一半。
荃灣愉景新城，有三成單位係合資格居屋家庭買得起。即係話，居屋入息上限只係調低一千大元，對私樓市場嘅幫助唔大。
教會機構幾乎買起卓能大嶼山梅窩卓濤軒地舖。長洲一家教會，為擴充服務，日前斥資206萬元購入卓濤軒地下4號舖，2124方呎，連貯物房2045方呎，呎價970元。另鴻運蔡漢陞同蘭西講，該舖面闊20呎，附近有泊車位，近碼頭，卻非位處遊客區，正合教會機構心意。
卓濤軒地舖已幾乎成為屬靈勝地，除3號舖將開設餐廳外，1號及2號舖由一間教會租用為教堂，該教會正與業主商議轉租為買。另5號舖位亦獲教會機構出價洽購。
馬灣珀麗灣噚日朝早攪珠，新地首次畀代理監票。聽講早前新地會會員內購珀麗灣，大部份票竟然集中喺其中一家代理行，所以，新地請埋各代理行睇實個攪珠過程，以示公平。
新地代理執行董事雷霆噚日出席中原嘅「珀麗灣全攻略」大會，主要講揀樓流程，同要注意事項，最重要係要一早搞掂晒文件同資料，填寫有邊25個單位想買，揀何種付款方法同要唔要裝修套餐，務求一埋枱就可以即刻成交。美聯下晝都搞咗個相同嘅大會，可見代理對呢個盤真係高度重視。
雷霆透露，老闆郭炳聯曾到珀麗灣視察，問佢「有邊啲單位冇咁好賣？」雷生就話佢唔識答，言下之意大家明啦！
另外，雷生又同代理講，銀行樓按將由地產街承造，佢笑笑口咁話，呢啲佣咁少，留番畀地產街做。地產街係新地屬下公司。
令市場鬧哄哄嘅珀麗灣，新地搞到啲準買家以為今次唔買，以後都冇機會買。查實喺馬灣發展計劃中，重有好多樓未起。
據新地呈交畀政府嘅馬灣發展計劃內容，（見表）左圖紅圈內就喺未發展部份，除近北灣的幾幢低密度住宅外，其餘座數的樓層大致都比𠵱家賣緊嘅座數高，有成2500幾個單位。地政總署發言人指出，新地已完成整個項目的補地價。咁即係遲早都會起樓啦。
市民可在北角政府合署17樓規劃署諮詢處索閱馬灣發展總綱藍圖（MasterLayoutPlan），詳細了解一下。
蘭西
電郵地址：