【本報訊】對於旗下TOM.COM收購亞洲電視失敗，長和系主席李嘉誠昨首度開腔回應，聲稱終止收購純粹是商業決定，與政治因素無關。他更表示：「完全無政治壓力，一絲一毫都無；而我相信，由我做（經營亞視），好少人會反對，但好多人好鍾意我做。」亞視行政總裁陳永棋昨日於另一場合上也再三強調，他很贊成李嘉誠說法，請大家不要將政治放進去，而他也有意洽購麗新系手上的亞視股權。
李嘉誠表示，「其實，對方都係想賣，但價錢有距離，而我哋嘅原則，完全無考慮政治因素，只考慮某一件嘢投資落去，對公司有利，對香港有利。」
對於消委會指在通縮情況下，超級市場貨品售價不跌反升，相信與超市壟斷、濫用市場力量操控貨品售價有關，身為百佳超級市場最終控股公司負責人的李嘉誠反問：「你話超級市場做一百蚊生意應該賺幾多才叫啱？有一家雜誌話超級市場（貨品售價）應該低百分之五。百分之五？我相信今日佢哋兩個人（指在旁的兒子李澤鉅及和黃董事總經理霍建寧）人工唔使發都唔掂。」
霍建寧亦指超市的報道不正確，並質疑資料的真確性，「我都希望有咁嘅事發生，等我唔使做得咁辛苦，bonus都好啲，但老老實實講，無咁好世界。」他又笑說：「我賣豬肉要減價，減咗價就俾人鬧。我講畀你聽，如果今日唔係我喺度，你哋重買緊二十四蚊斤豬肉，因為我哋喺度，你哋畀緊十九蚊。你話我哋價貴，我覺得好唔公道。」
另外，霍建寧又否認旗下新城電台由於自我審查，故裁退一名新聞部員工，更說「我就經常都有指令，但我的指令只係要佢賺錢。」