兩星期前，建築邦發起「老友周末歡聚日」，拖男帶女到金鐘香格里拉七樓CafeToo食自助晚餐。一仄之下，每位盛惠三百三十八元再加一，幾貴噃，有啲肉赤；但建築邦知道現時去消費，最緊要問清楚用邊張信用卡先至有優惠，於是打電話去再問清楚。咦，得咗，揸滙豐銀行白金卡嘅，兩位八折，三至四位七五折，五人或以上就七折，我哋一Call就有十零人啦，三三八元加一再打七折，即係每位二百六十，係五星酒店嘅標準價格，食得過啫。之不過，邊位有滙豐白金卡呀？哦，C太舉手，於是即刻訂位。
上星期六去到金鐘香格里拉，咖啡室擠滿人群，全場爆滿，生意好到不得了。惡佬明話：「唔通經濟V型反彈！」一位夥計聽到，苦笑話：「邊有反彈吖，我哋就做到死，上面嘅扒房得七個客咋！」香港人現在冇乜心機文化去食扒房法國餐咯，最緊要物有所值，睇食得飽唔飽。呢度嘅自助餐，食物種類最多，甜品好豐富，河粉、Pizza、印度咖喱齊全，包保大胃王都會食到坐響度，而且，最緊要嘅就係，食物味道好，材料高級。綜合而論，呢度嘅自助餐好過其他酒店。
左丁山食自助餐淺嘗即止，唔會賺到本，啲細路（中童）就好玩咯，興高采烈食到肚脹。香港餐飲業兩極化，上至高級自助餐下至茶餐廳，同樣好生意，只有中級酒樓奄奄一息。