黃伊汶日前往廣州，拍攝一個內地時裝電視廣告，當日黃伊汶與一名長髮俊男，以及過百位臨時演員齊跳A-go-go。黃伊汶更在當地的按摩院揼骨，只花二百元便享受到貴賓級服務。
黃伊汶（Dior）早前為內地時裝「永藝」拍攝平面廣告，上周她再往廣州，為該牌子拍攝新一輯電視廣告，雖然只拍了一日，但Dior亦交足功課，與過百位臨時演員共舞十小時，Dior日前接受電話訪問時笑說：「嗰日真係跳得好誇張，跳完之後，我對腳都有啲抽抽哋筋。」
Dior更在廣州的按摩院揼骨，她笑說：「我哋三個女仔包咗間房揼骨，揼咗成兩個幾鐘頭，埋單都係二百幾蚊，咁就可以做大爺啦！」
而Dior拍攝的廣告片，內容講述有兩名男士邀請她跳舞，但Dior卻選擇了另一名長髮俊男做舞伴。而擔任廣告男主角的長髮俊男Brian原來是香港模特兒，早前他亦曾參演周星馳所拍的生力啤廣告，並以F4造型示人。
Dior當日與過百位臨時演員大跳A-go-go，她說：「我喺之前一晚去到廣州練舞，拍嗰日有咁多人一齊跳都好熱鬧，拍得幾順利，冇乜點NG。我初頭着住對靴拍，後尾覺得對腳好痛，所以我除咗對靴赤腳跳舞，反正個鏡頭都影唔到對腳嘅。」
由於Dior拍竣廣告後要即日趕返香港，所以她由廣州搭的士到深圳，Dior說：「我趕唔切搭直通車，咪坐的士去深圳囉，我重同個的士司機講價，由四百蚊講到二百蚊咋。」
採訪：朱芷瑩