Kenya
呢間係我喺肯雅住得最舒服嘅Resort。
同樣係睇動物，不過今次主打嘅係睇百萬紅鶴，同樣係住Resort，不過今次住嘅係超級乾淨嘅偌大套房，朝早坐住越野車，攞住支長鏡四圍追蹤動物足迹。入夜後同土人勁歌熱舞，食個燒烤自助餐，攰攰哋返房休息，點起火爐，以呯啪呯啪嘅火屑聲做配樂，配上窗外嘅蟬蟲為你演奏嘅自然安眠曲，睡一覺，真爽！
記者、攝影：朱維達
鳴謝：捷旅假期、阿聯酋航空
SarovaLionHillLodge位處首都奈羅比Nairobi西北約156公里，車程約需2小時。離開首都，除咗由石屎路換上凹凸不平嘅石路，車上乘客就要開始長途嘅激「動」之旅。不過中途除咗會停一停油站，好讓車輛加加油、畀我哋放放水之外，我哋重探訪咗一條貧困非常嘅MaasaiVillage，除咗可以乘機鬆鬆骨，亦親身體驗到世界重有好多人慘過自己百萬倍。
MaasaiVillage名副其實係一條牛屎村，皆因自車輛停喺村口，已嗅到一陣陣牛屎味，所謂村口，亦只係由鬆散嘅茅草搭成嘅門口，入內一踩就已經滿鞋牛屎，原來村內由地下至村屋至內裏間隔，全都由牛屎建成，村民貧窮得可想而知，佢哋話用牛屎建村，一來唔使錢，其二就係如果搭得好的話，村屋就算經歷風吹雨打都可以用上6年。
經村民介紹，每間「大」屋都會有一間BB房、小牛餵飼房、主人房、客廳同廚房，但係從只得約一呎闊嘅門口入內，駭然發現內裏唔單止無照明設施，以上所提及嘅設施竟只屈建於不足百呎嘅「大」屋內，而且即使中午烈日下，屋內仍漆黑一片，待眼睛適應過來先可以隱約觀其布置，我哋其中5位朋友入內，只有2位有空隙坐喺用大荷葉鋪上面嘅牛屎櫈，再出去睇埋一眾大小村民樂天安命唱歌捉迷藏，成日唉聲歎氣嘅香港人係咪應該反省吓？
或者咁大個仔都未見過、世上最貧困嘅一群，30分鐘車程到咗SarovaLionHillLodge之後，就好似到咗天堂一樣！先嚟一班掛上金銀器飾物嘅土著跳番part迎賓舞，再嚟一杯welcomedrink解解喝，放低行李之後就即刻上路，去邊？每位遊客嚟到呢個國家保護區，相信9成9都係想睇呢度獨有嘅紅鶴啦！
同之前幾日旅程一樣，帶齊水壺、長短鏡、太陽油、大包細包零食之後就跳上車，準備探訪百萬紅鶴。起初我同你都懷疑究竟一個LakeNakuru有無可能容納到成百萬隻紅鶴，但唔使30分鐘車程之後，車內7人就已經嘩聲迭起，車未停定已爭先探頭出車頂，睇睇那「鑲滿」湖邊嘅紅鶴！原來呢群紅鶴每日晨早及傍晚都會飛走，其餘時間就到LakeNakuru湖邊覓食豐富海產，呢群紅鶴有粉白色羽毛，修長嘅粉紅美腿加上粉紅鈎嘴，就算未去過已經可以想像到百萬擁有粉白羽毛嘅紅鶴棲息於湖邊嘅壯觀情景！
正如其他國家公園一樣，呢度同樣有獵豹、狒狒、水牛、禿鸛、斑馬、鵜鶦等野生動物觀看，但由於當日天氣轉壞（3-6月為當地雨季，所以7-10月則為旅遊旺季），大部份動物都不見蹤影，司機兼導遊亦鑑於路面情況惡劣而急回營地。
其實辛勞咗幾日，返番營地享受箇中設施亦未嘗不是件樂事。但縱使SarovaLionHillLodge內有泳池、桑拿浴室、田園式餐廳，我最終都係最愛我間房（營地依山而建，但鄰近地面嘅套房面積會較大）。難得畀我住到呢間約千呎嘅偌大套房，方發現荒漠一片嘅原野上竟有如此五星級設施，確實難得！回想起上午到訪MaasaiVillage村民嘅苦況，夜晚我就坐喺蚊帳內嘅三人大床，聽到火爐周遭發出嘅火屑聲，睇到漆黑中嘅雨點敲窗……突然間，覺得自己原來好幸福。
簽證： 持BNO、特區護照及CI者都可以於肯雅機場辦理落地簽證，費用50美金，香港並無肯雅領事館，可向英國領事館簽證部查詢有關事宜，電話：29013111。
旅行團： 可參加逢星期六出發嘅東非肯雅8天團，團費：$13,998（團號：JKD）。查詢：27366111/29047211（捷旅假期）