何超儀、張燊悅、尹子維同吳彥祖噚日應「海洋公園與群星獻愛心暑期慈善活動」邀請，同三百五十個清貧少年一齊去海洋公園玩。
張燊悅平時嬌滴滴咁，佢噚日就跳跳紮，乜嘢遊戲都想玩，佢玩完「笨豬跑」、「熱鬥盲牛」同「反轉梅花樁」遊戲後，大叫過癮，膽識絕對唔輸蝕過吳彥祖同尹子維兩個男仔。而吳彥祖除咗玩遊戲外，重好受學生哥歡迎，簽名簽到手軟咁滯。
而何超儀因為之前整傷過腰骨，所以乜嘢遊戲都唔敢玩，而且佢嚟緊要拍一齣動作片，所以費事又整親，超儀話：「我整親脊椎軟骨，影響坐骨神經，𠵱家已經做緊物理治療，我次次都係幫無綫拍嘢整傷㗎。」
姚嘉妮同鄭敬基噚日錄影無綫遊戲節目《一觸即發》，未錄影前佢哋兩個分別試跳，但可惜姚嘉妮第一次試跳就扭傷腳。
問姚嘉妮嘅傷勢，佢就話：「我一直以為個窿好高，但其實好矮，落去嗰吓就好痛，𠵱家OK啦。頭先工作人員都有幫我搽跌打酒，不過我都慣囉，因為我成日都扭親手腳。」
梁詠琪（GiGi）早前接受新城《娛樂一早》節目錄音訪問，佢做咗個心理測驗，測試佢心目中嘅理想情人類型，主持問GiGi理想家居係點，佢話：「一定要有海景，有陽光，白色為主但唔可以冷冰冰。其實我着重環境，屋裏面可以有靚裝修，不過係次要。」
結果分析GiGi揀男友要睇外表，要有實力同安全感喎。
台灣人氣組合F4憑一套劇集《流星花園》竄紅，佢哋𠵱家趕拍緊《流星花園2》。原本話《流2》會喺十一月播映，但係個劇到𠵱家重未殺青，搞到F4嚟緊下月喺內地舉行嘅演唱會被迫順延，重嚴重到令F4成個亞洲巡迴演唱都要押後，原本F4年底會喺大馬開騷，但𠵱家要等到出年先至有機會。
楊天經噚日喺銅鑼灣出席佢做代言人嘅健康產品宣傳，同時亦宣布佢會續約一年，酬勞重會提高。天經話相當滿意酬勞，佢重會四圍推介呢隻產品，其中當然包括佢媽咪陳寶珠啦。而天經密密接工作做，收入增加唔少，所以佢計劃請媽咪同經理人去旅行，呢次重係佢咁大個仔第一次請媽咪去旅行咋。
成龍噚日喺台北同台灣導演楊德昌開記者會，宣布合作推出一系列以成龍卡通作造型的數碼產品，包括動畫電影、電視卡通、網上遊戲同網上動畫等。成龍話起初佢想搵楊德昌合作拍文藝片，點知對方有咁好嘅提議，一拍即合。成龍十月重會去德國翻拍經典電影《八十日環遊世界》，可能會同曉格蘭特合作。