馬薛芷倫自與馬清偉傳出分居後，有指她已搬離馬家，昨日更有報道指她現租住銅鑼灣板間房，她昨日在電話中否認其事，表示只是往朋友家打麻將，但卻不忿報道指租住銅鑼灣板間房的人是「折墮」。
馬薛芷倫（Fanny）自與大生銀行家族成員馬清偉傳出分居消息後，早前有傳她已搬離馬家，馬清偉更以二千六百萬元購買山頂貝璐道一幢排屋給她。昨日有雜誌卻指Fanny因新居正在裝修未能入住，但因她與丈夫分居後沒有錢，故要租住銅鑼灣板間房，更以「折墮」來形容她，又謂她頻與外籍人士傳緋聞，獨愛「西人」，Fanny昨日接受本報電話訪問，統統予以否認。
Fanny說：「我嗰晚只係去朋友屋企打麻將，傾吓偈，啲人只係影咗一兩張我出入大廈嘅相就砌我住嗰度，呢次都唔係第一次，每次我喺邊幢大廈出入，就話我喺嗰度有私竇，咁我咪有好多層樓？但又要講到我好窮好慘咁，我覺得啲報道自相矛盾，得啖笑。」
Fanny謂她不會為此動氣，她只覺得無聊及無奈，她又說：「同朋友去飲嘢又話我去蒲，𠵱家唔去bar，只係去朋友屋企打吓麻將，都會俾人寫嘅，我真係唔知我可以點。」不過對於被指住銅鑼灣板間房是「折墮」，Fanny不忿地說：「我唔明點解住銅鑼灣板間房係折墮，唔通啲朋友一定要住半山先叫高貴咩？我覺得有呢種階級觀念嘅人，先真係折墮。」
問Fanny現在是否仍與馬清偉同住？她說：「點解要知我住邊呢？𠵱家已經成日有人跟我影相作古仔，重唔夠咩？其實我最唔開心係啲人影我啲仔女，我唔想我啲仔女俾人騷擾。」
提到常與外籍人士傳緋聞，被指「最愛西人」，Fanny則謂：「做朋友邊有分顏色㗎，只要傾得埋，心地好，唔理黑人、白人定黃種人都可以係好朋友，同埋我想強調，唔係有個男仔企喺我隔籬就係男朋友，咁無知，你會唔會有鬚就認老竇呀？」
採訪：蔡如玉