黎姿日前往廣州拍樓盤廣告，穿上泳衣和吊帶裙，大騷身材。而樓盤商更照顧周到，找來三名按摩師，為黎姿和她的專用髮型師及化妝師按摩，消除工作疲勞。
黎姿日前到了廣州拍攝時代花園樓盤廣告，廣告中她除了穿泳衣示人外，又穿着浴袍，與八位猛男一同拍攝。雖然黎姿首次接拍樓盤廣告，但她日前接受訪問時表示今次拍攝的感覺十分好，因為廣告商對她照顧有加。
至於要穿着泳衣拍樓盤廣告，黎姿自言是第一次，她說：「第一日開工嘅時侯，感覺上真係唔似拍緊樓盤廣告，因為我以前覺得拍呢類廣告唔會搞咁多嘢，所以覺得同拍化妝品廣告差唔多。當我着住泳衣準備拍攝嗰陣，重以為要游水，但係結果又唔使，重有八個猛男伴住我，都幾大陣仗㗎。」
今次拍這個廣告有七位數字收入，黎姿覺得很滿意，而且廣告商對她照顧周到，在拍攝的兩個工作日，特別找來按摩師為她及其髮型師和化妝師按摩，令黎姿能夠真正消除工作的疲勞，她說：「個樓盤老闆驚我會拍得攰，所以搵咗三個按摩師嚟拍攝現場，一個幫我按摩，其餘兩個就分別幫我嘅化妝師同髮型師按摩，佢哋重幫我做埋腳底指壓，真係好舒服。」
黎姿續說：「而且老闆重話如果我買佢個樓盤嘅樓重有折，不過我又唔係經常去廣州，買間屋喺嗰度都冇乜用，所以我最後都係推咗佢嘅好意，如果要買樓，首選我一定喺香港買。」
採訪：魯萍