近年狀態大勇嘅奧迪車廠，繼全新A8車系後，最近外國方面又有消息傳出，謂廠方正研製一款全新嘅Coupe跑車，除外形極富CyberFeel外，高達420匹嘅馬力輸出更教人為之心動，並視保時捷911Turbo為假想敵。
從預想圖中可以睇到，呢部暫未有確實名稱，廠方編號為RSR嘅Coupe跑車，造型設計極富Cyber氣息，而闊大鬼面罩襯以大口徑跑車合金胎軨，更能顯現出一份高性能跑車韻味；不過由於新車仍屬研製階段，故未有關於車廂布局呢方面嘅詳細資料，一般相信新車會以雙座位設計外，布局亦會以跑車化為主。不過相信最吸引嘅，就係廠方預算會為其裝上一台4.9或5.0公升嘅V10引擎，馬力輸出數值達420匹，匹配上奧迪獨有嘅Quattro四驅系統，同埋一套全新嘅6前速手波，難怪0至100公里加速度需時僅為4.5秒，極速更可高達240km/h咁快啦。睇嚟當新車正式推出時，一眾同級對手真係遇上勁敵喇。