早排發展商要代理幫手賣樓,時不時都會舉行銷售比賽,以「重賞」加快賣樓進度。不過,近排竟然輪到代理行舉行頒獎禮,送獎又送禮畀發展商。
利嘉閣地產噚日就頒發一個名為「最具市場觸覺獎」畀廖創興企業,因為佢個九肚山皓朗山莊,上月至今累售三間獨立洋房及十四間半獨立屋。利嘉閣認為該盤銷情理想,與發展商嘅銷售策略有密切關係,於是頒個獎賀佢。
負責市場策劃嘅第一太平戴維斯,亦獲頒「卓越市場策劃獎」。利嘉閣係皓朗山莊嘅銷售代理,今次頒獎畀發展商,既可增進情誼,又可增加公司曝光率,做生意都容易啲。近期連番報喜嘅利嘉閣,聽佢哋沙田豪宅分區經理楊振宗講,九肚山去年有15宗成交,而今年淨係最近呢個多月,皓朗山莊已包辦咗17宗,已經超過去年總成交。
多個大型新盤開賣,樓市又再熱火朝天,但市況係一手愈暢旺,二手就愈冷清,表面原因係代理專注做一手,冇時間理二手。地產代理向蘭西解釋,其實做二手要慢慢同業主傾價,花較多時間先做到一單交易,唔似發展商啲樓盤埋枱做成嘅機會較大。所以代理帶客去睇二手樓,除非業主肯大劈價,唔係代理就即刻游說個客去買一手樓,咁搞法二手成交又點會多呢?二手業主面對呢個情況真係唔知點算好。
另外,代理喺報紙登廣告,好多時都會有一個建議還價畀個客參考,通常低業主叫價一兩成,但蘭西最近見到元朗加州花園一個1463呎單位,代理建議買家嘅還價係128萬,竟然係業主叫價(290萬)嘅四成四。呢個屋苑,據講行內一向都係登個建議底價出嚟,吸引買家,當有客問到就講番個近期成交價(約250萬)畀客聽。「開天索價,落地還錢」,最後都係睇邊個夠牙力。
市場由買家主導,業主議價能力自然較弱,但九龍灣德福花園就出現撻定重售例子。
利嘉閣東九龍高級分區經理余艷霞透露,B座中層14室,六百幾方呎,原業主本以119萬沽出,因有其他準買家有興趣,於是撻定重售,結果以124萬成交,貴咗5萬。雖然呎價低市價一成,但原業主八六年購入價為48萬,仍有利可圖。業主撻定重售單位,反映佢對樓市好有信心。
寫字樓價格持續下跌,但最近竟然出現新高呎價,屋之島董事總經理黃志強話,呢個單位係尖東新東海商業中心13樓12室,2788方呎,全海景,由本地用家以818.8萬元購入,呎價2937,創今年新高。
黃志強解釋,造到新高呎價,原因係個單位係該廈唯一全海景放盤,買家為求心頭好,所以至肯畀高啲價錢;睇個成交價都好多個8﹙諧音發﹚字㖭。呢個單位係由香港建設持有。
5月份新東海商業中心7樓7室,2207方呎,成交價596萬,呎價2700。
樓市俾馬灣珀麗灣搞到鬧哄哄,一眾發展商當然抓緊機會,借勢賣樓。據聞,恒基同新世界,近期再促銷元朗蝶翠峰二期,準備周末及周日喺現場搞嘉年華會,為加強號召力,有意請來「人氣」女歌星陳慧琳做嘉賓;不過,由於呢位歌影視「大紅人」實在沒有空檔,元朗街坊就錯失親睹其風姿嘅機會。傳聞發展商出價高達40萬。
另外,聽聞九人女子組合Cookies,憑其青春活力,亦被發展商考慮作為該盤表演嘉賓,但到最後,發展商決定都係用番平實風格,用現場抽獎替代嘉賓贈興。今次最得益嘅,應該係一眾睇樓市民,因為有獎品收始終實際啲。
蘭西
電郵地址: