呢輪香港車壇颳起一陣減價風潮，將車迷嘅目光移開。但亞Mark所知今年底至明年上半年，會陸續有多款新車到港。早前歐洲傳來消息，話寶馬車廠會響嚟緊9月巴黎車展，推出全新Z4開篷Roadster跑車，據知新車經已準備就緒，或許年底前會率先響北美登場之餘，聽聞香港方面，代理亦有望明年上半年引入㖭！
雖然新車至今廠方仍未有詳盡資料公布，但兩台分別2.5公升（馬力189匹）同頂級3.0公升（馬力231匹）偈配搭，就幾乎可以肯定；新款Z4線條較原有Z3，要來得硬朗同有性格之餘，聽聞新Z4嘅假想敵唔再係奧迪TTCoupe，又或者平治SLK，而係剛推出Facelifted新版嘅保時捷Boxster，究竟部車係咪咁正？有興趣嘅車迷，不妨留意吓我哋《車天車地》版嘅報道喇！