美股及亞洲股市早前遭到拋售，照計基金所持現金比重會高咗，若經濟轉趨穩定，相信全球主要股市應有一次強勁反彈。
不過，美國上月錄得500億美元流出，是歷來最大規模一次，反映投資者真係對美國企業帳目有信心危機，雖則話美國投資者踏入8月已經轉趨冷靜，但資金大舉流向美債，30年長債孳息率跌破5厘，就知道芬佬預期未來可能重有一輪贖回潮，所以投資策略特別保守。
國內移動電訊市場競爭愈來愈激烈，聯通（762）CDMA網絡可能轉戰預付卡市場，將對中移動（941）構成威脅。最麻煩係聯通可能會發覺本身GSM網絡及CMDA網絡有重叠，將CDMA售予獲得第三個移動網絡牌照嘅營辦商（好大機會係中國電信）。呢個問題一直係基金投資者所顧忌，因為第三個營辦商毋須花時間建網絡就可以即時入市競爭，令三分天下嘅局面加快出現。ｉ師傅話，唔怪得近期市場傳出好似有個對沖基金累積緊中移動淡倉啦。
金科數碼（922）自從轉咗新大股東後，股價一直造好，新大股東重心急到喺業績公布限制期內入市增持，因而遭到聯交所抽秤。雖然新大股東暫時唔能夠再增持，不過重有好多有心人士入市托住。黑客話，由於有人想取得金科數碼控制權，可能會有大動作或注資，不過就唔會短期內進行。
中航興業（1110）憧憬注資炒上，不過請大家冷靜啲，聽有關官員嘅口脗，國航借殼中航興業上市只係其中一個考慮，若本身資產合符規定及業務表現理想，可能會自行上市。咁即係話，有好嘢都未必輪到中航興業。
阿 虎