我求大俠唔係想響度向碧咸嘅迷哥迷姐挑釁，不過呢位英格蘭國家隊靚仔隊長，如果連打中路位置都可以稱職嘅話，成就豈止於此？
就連國家隊領隊艾歷臣都係咁諗，最近重借傳媒把口同曼聯領隊費爵爺講，叫佢要畀多啲機會碧咸踢中路，唔好局限佢只能響邊線發威。
相信除咗我同艾歷臣之外，千千萬萬嘅碧咸迷都會想費格遜咁做，不過曼聯中路人才濟濟，費格遜又出晒名唔聽人點頭點路，睇嚟艾歷臣都係得個「噏」字。
我諗大家都記得意大利響世界盃輸波後，韋利彈過教練查柏東尼太保守。據講佢老人家重懷恨在心，早幾日響場邊睇貝盧斯科尼盃時見到韋利都無打招呼，唔係咁記仇啩？話晒韋利係國家隊主將，而講到尾，我求大俠都同意韋利當日嘅講法喎。
法國美男真路拿今季仍然無班落，睇嚟足球生涯都近尾聲，想當年佢挾住勁勢加盟英超，點知個結局就淪落至此，真係坎坷！不過最近有片商睇中佢個台型，準備搵佢拍戲，都好吖，咪當拎番個安慰獎囉。
噚晚連場國際友誼賽，大部份球隊啲主將都因為球會唔放人「稱傷」退隊，不過都有啲真係抽唔到身為國家隊上陣。好似熱刺嘅前鋒艾法臣，就因為響家鄉挪威嘅細佬撞車，即刻趕去醫院陪住屋企人，周末聯賽都未必會替熱刺上陣。咁重兄弟情，我求大俠都希望佢細佬快啲好番。
今年嘅NBA新秀狀元姚明雖人未到侯斯頓，但從上星期五起，七幅姚明嘅大型廣告版同時出現喺侯斯頓最繁忙嘅大街同十字路口，不過好多人都好奇點解個廣告只見到姚明嘅上半邊面。等我求大俠話你知啦！其實火箭炮製呢個半邊面廣告嘅含意係，𠵱家球迷對姚明嘅認識只知一半，還有下一半，係龍係蟲，大家等新球季開鑼後拭目以待吧！