早排炒到飛起嘅和記港陸（715），近排股價同好多細價股一樣，回落咗好多。經紀黃話，聽聞好多鬼佬大行都中咗招坐緊艇，但佢哋仍然死心不息，認為有超人嘅招牌，同埋派落去董事會嘅陣容，隻股冇理由會唔做嘢，憧憬會有一次大反撲。和記港陸剛剛公布中期業績，由虧轉盈，賺2300萬元。
隻股5月最高見過1.14元，但因創辦人減持，超人又冇注資，股價輾轉回落，在仙股風暴中，一度插落0.50元水平，高位摸咗貨嘅朋友，真係喊得一句句，但近排唔驚唔覺又上返去0.64元水平。
講起和記港陸嘅創辦人，剛在公布業績前仙遊，但公司家陣由佢位公子同埋和黃（013）嘅要員主理，按道理就冇咩影響，只係唔知後人會否繼續減持股份。
公司家陣除咗繼續做玩具業務，亦有發展其他通訊製造業務，公司坐擁大量現金．按道理股價喺現水平應該可以守得穩。
慕容小初