曾在報館任職記者、現時在劉鑾雄（大劉）華置任職的陳凱韻，被指投靠大劉後即一次過以現金四百萬買入跑馬地單位，並接替大劉新女友呂麗君，掌管華置廣生堂的雙妹嚜業務做揸弗人，親自貼街招。昨日大劉回應說：「我遲啲喺中環掃街，咪做埋香港揸弗人？」
昨日出版的一本周刊，指曾任職報章娛樂記者、現時任職華人置業的陳凱韻（甘比），投靠大劉之後忽然富貴，一次過以四百萬現金購買了跑馬地一個單位，又指她在華置短短一個月，即接手已有七個月身孕的大劉新女友、九八年落選港姐呂麗君的工作，掌管華置售賣雙妹嚜化妝品的廣生堂化妝品部門，所以二十二歲的陳凱韻在大劉心目中的地位，絕對不比呂麗君遜色。
報道亦指陳凱韻在剛過去掛起一號風球的星期日（十八日），仍到銅鑼灣地帶廣生堂門市巡視業務，更幫手在舖頭貼出清貨減價的宣傳街招。
其實陳凱韻買樓時，仍在報館當記者，報道指她今年五月中和家姐成立一間空殼公司，五月尾用三百八十萬元買入跑馬地誠和閣一個八百五十二呎的高層連車位單位，並全部以現金付款。而在五月初，曾有傳媒拍下大劉和地產經紀在跑馬地睇樓的照片，陳凱韻於六月中才正式辭去記者一職。而舒淇亦曾租住跑馬地誠和閣。
大劉前日已率先踢爆有周刊會暗示他買樓給陳凱韻，但他對此事不置可否。昨日記者致電大劉，他回應說：「我本人或公司，冇人哋咁識做宣傳，又話買層樓畀公司嘅職員、又話買架跑車畀公司嘅職員，但原來層樓、架車都係職員自己名，重係分期付款，而且係職員本人自己供嘅，事實上層樓唔係我畀錢。」
至於有指陳凱韻掌管廣生堂雙妹嚜的生意，成為揸弗人一事，大劉笑說：「除非我公司好似G.E.（通用電器）咁大，先有咁多揸弗人啫！如果揸弗人要喺公司大減價嗰陣貼埋街招，咁我遲啲喺中環掃街，咪做埋香港揸弗人？」大劉續說：「佢入咗嚟公司只係幾個禮拜，工作經驗咁淺，如果咁都係揸弗人，咁公司嘅看更都係揸弗人啦！」
雜誌又提及陳凱韻和大劉相識，是因為任職的報館上司安排她採訪大劉，其後她和該上司及一班同事應大劉之邀往福臨門食過一次午飯，之後更和大劉常有電話聯絡。
大劉說：「我的確有請過記者喺福臨門食飯，因為當時佢哋採訪我同李洪芷晴嗰單新聞，見啲記者做得辛苦，事後我請咗有份採訪過呢單新聞嘅記者食飯，但我只係請嗰六、七位記者，根本冇請到嗰位上司，亦即係『六月飛霜』，係佢自己走嚟嘅，之後就傳出我送湯、送燕窩追呢個人，但呢啲根本就唔係事實，事後發現的湯同燕窩唔係我送，係我嘅××送嘅。」
大劉續說：「其實『六月飛霜』未離開報館之前，我一直係同佢聯絡開，直至佢走，報館先至搵甘比（即陳凱韻）聯絡我。今次成單嘢，其實都係『六月飛霜』喺度搞鬼。」
昨日記者致電陳凱韻，問她買樓是否和大劉有關，以及她和大劉的關係，陳凱韻說：「所有有關我私人嘅嘢，我都唔會答。」
採訪：張止寒
攝影：馮美茵