新任港大校長徐立之九月一日上任，新人來舊人去，噚日一班港大校友歡送現任校長戴義安，出席者包括財爺阿松、陸觀豪同新婚太太、蔡素玉、黃宏發等等，地點係中環畢打行上海灘樓上一間古色古香中國茶館會所。
阿松到場時有電梯都唔搭，寧願行樓梯，八方問佢小伏係咪真係有喜，佢都係笑笑口嗰句：「私人事唔答。」呢間會所及物業聽講都係霍英東家族所有，要會員先有得去飲茶。八方見到發叔黃宏發，問佢係咪會員，點知攞住杯酒歎緊嘅發叔就話：「我都唔飲茶，所以唔係會員！」
講番戴義安教授，來港二十三年，對香港當然好有感情，佢話從來都冇諗過會做大學校長。講起呢樣嘢要多得港大前校長鄭耀宗，因為九一年開始擔任副校長嘅戴義安，喺二○○○年鄭耀宗因民調風波下台後，被委任為港大校長，臨危受命。對於前波士，佢有讚冇彈。
呢次退休佢都退唔晒，戴義安神神秘秘咁同八方講，原來新任校長徐立之已經誠邀佢做校長特別顧問……六個月咁多啦！咁又啱，徐校長點都係新手，有佢幫吓，上手都快啲。聽講徐立之已經提早嚟咗香港，日日喺港大周圍行熟悉環境。
傳真︰2623-9278
電郵︰