《蘋果》馬經話明新馬季大搞新意思，以吸引讀者，我哋且拭目以待。有一樣馬經版一定唔改嘅，就係馬主馬評人貼士大賽。呢條橋大概有啲吸引力，其他一張報紙想話照辦煮碗，但搵馬評人參加就易啫，搵馬主就比較難，《蘋果》馬經嘅馬主有知名度，兼唔怕輸或贏，跑第一嗰位固然笑哈哈，跑第尾嗰位一樣冇難為情，你估咁易搵咩。
上季《蘋果馬經》嘅馬主馬評人貼士大賽冠軍係呂少文，就係經常擔住口大雪茄，「豪情快勝」、「豪情穩勝」嘅馬主，佢根本贏幾個馬位，其他人冇得追，點解咁勁呢？據呂少文對編輯童輝講：「我好認真㗎，每次賽馬日前一日，我都做兩三個鐘頭功課，打電話畀相熟馬主、圈內人攞料，再比較各場形勢，先至決定畀蘋果嘅貼士，過程都幾辛苦㗎，下屆我想唔玩咯。」
童輝為之嚇到面青，當然立即捉住馬主呂講古，講咗一大輪，馬主呂先至話：「唉，再勉為其難啦！」童輝先至放下心頭大石，否則點向蘋果馬經版嘅讀者交代呀。暢銷報紙不能無馬經，馬經嘅最大賣點，當然係貼士準，否則多多理論分析都冇用，馬主呂啲貼士有睇頭，自不然要抓緊佢啦。貼士比賽，好多時都係玩意啫，想「貼中率」高，次次貼「靚蝦王」、「電子麒麟」之類明星熱門馬，多數掂，不過你估馬迷會欣賞你咩，正因如此，馬主呂敢貼一啲二十倍冷馬，先至值得拍掌。