煲呔去咗澳洲，噚日本地一份周刊就爆咗佢一單負面新聞，話佢八月十日佢飛去北京探仔時，喺香港機場「恃官威欺壓港龍地勤」。
事緣煲呔行貴賓通道上機，去到閘口俾一位空姐截住查身份證，報道引述一位空姐話煲呔面口非常難睇，事後重去投訴。據港龍方面解釋，話閘口查身份證係自九一一後實行嘅新措施，因為想加強保安。八方心諗，唔通閘口嗰位空姐覺得煲呔個樣似恐怖分子？港龍就話對乘客一視同仁。
至於投訴一事，身在澳洲嘅煲呔就經新聞秘書朱曼玲同八方喊冤，話自己在閘口彎低身去攞身份證時，有人同佢講，「曾司長，唔使啦。」上機之後已經將件事拋諸腦後，唔明點解話佢恃官威投訴。港龍亦表示冇接過煲呔或佢嘅代表投訴，而負責管理機場貴賓通道嘅禮賓處就承認，有向港龍查詢入閘時嘅新安排，因為要通知使用通道嘅貴賓，免得佢哋收埋咗證件又要摷番出嚟就好麻煩。
傳真︰2623-9278
電郵︰