立法會議員陳婉嫻噚日帶衞生福利及食物局局長楊永強去北角渣華道街市巡視，因為北角邨居民搬走後，個街市水盡鵝飛，加上街市咁多年都冇冷氣，商販及居民叫苦連天。
凍肉舖老闆莊先生同楊局長傾咗兩句，事後記者埋去問佢傾乜，點知莊生話：「我講一句，佢就窒一句！」原來莊老闆同楊局長話呢度好熱，「點知楊局長問我係咪啲燈膽熱呀？不如用慳電膽啦！」楊局長又建議莊老闆將啲凍肉之類包裝好先賣。莊老闆話：「佢梗係好少去街市，啲客鍾意自己揀，包住點揀呀？」楊局長之後去咗同樣受冇冷氣之苦嘅牛池灣街市巡視。
嫻姐話啲商販好慘，希望政府正視呢個問題，但睇嚟楊局長首先需要改善自己同市民溝通之道，如果唔係好易激嬲咗啲市民。
（圖）楊永強（左）和陳婉嫻巡渣華道街市時，楊竟觸怒商販。
傳真︰2623-9278
電郵︰