香港明天會更好基金每年必請美國國會代表團，來大陸同香港一遊，見證係咪真係「明天會更好」，當中牽線嘅係一個美國智庫（ThinkTank）美京美亞協會，今日代表團會同律政司梁愛詩一齊食早餐。協會主席劉德光同八方講開，原來佢同詩姐係老友記，五十年代詩姐重未執業，仍在聯交所前副主席冼祖昭父親開設的律師行做文員時，劉德光已經識得詩姐。
後來詩姐讀完法律正式執業，喺美國開律師行嘅劉德光，又搵詩姐幫佢處理香港嘅商業、遺產案等業務，因為覺得詩姐好聰明，分析力又強，估唔到今時今日詩姐重做埋香港法律界一姐。
咁劉主席打理嘅智庫究竟做啲乜？會唔會幫中國政府游說美國國會議員？劉主席聞言即刻好緊張咁澄清，話協會喺國會投票時會幫中國政府數吓人頭，即係有幾多票會幫中國，但就絕非牟利團體，亦唔做游說工作。不過佢感歎美國佬好情緒化，一小撮人鬧中國就足以影響表決結果。
（圖）美京美亞協會主席劉德光（右二）今日與梁愛詩食早餐。
傳真︰2623-9278
電郵︰