劉鑾雄昨日召開記者會，表示有雜誌想乘其女友呂麗君懷孕之際，報道他與一名曾任報章娛樂版記者的下屬陳凱韻有不尋常關係，並會暗示大劉送樓給對方。大劉聲言不想益該本雜誌，所以自行踢爆。至於送樓一事是否屬實，大劉則不置可否，只說送樓給員工很濕碎。
即將做第三任父親的劉鑾雄（大劉），昨日在其灣仔辦公室召開記者會，原因是他聲稱會有一本雜誌，報道他與現時在華人置業工作、曾任職報章娛樂版記者的女下屬陳凱韻有不尋常關係。大劉表示不想被該雜誌利用，所以決定提前將事件踢爆。現年二十三歲的陳凱韻任職記者期間，與不少名人和藝人相熟，包括伏明霞、葉靜子、周星馳及羅兆輝等。
劉鑾雄昨日說：「報道嘅內容我唔知，但雖不中亦不遠矣！係想講某人（大劉新女友呂麗君）有BB，但另外重有唔同嘅女性朋友，以求令到我或者我身邊嘅人唔開心。而我相信佢哋嘅焦點會放喺女記者身上，本雜誌咁做，一為銷量，就算銷量唔得，打擊吓我都好，最好就兩者兼得。坦白講，我唔想呢份周刊做獨家，所以搵大家嚟傾吓。
「啱啱嘅星期日，有唔同報館收到fax，而fax嘅內容，對呂小姐算係輕手，只係講佢大咗肚，但對呢名女記者嘅怨恨就好重，形容得好得人驚，經過我調查，知道係有人刻意放料。而呢名女記者𠵱家的確喺華置做，工作性質同trainee（練習生）差唔多，入咗嚟幾個禮拜。我亦知道呢本周刊想影射或者暗示我買咗層樓畀呢名女記者。」
記者追問買樓一事是否事實時，大劉說：「呢啲濕碎嘢啫，講嚟都嘥氣啦，而且係私人嘢，係私隱，有冇都唔重要，唔係大不了嘅事，點解我要答呢？以前我送過三層樓畀三個司機，送過一層樓畀揸船嘅人，唔通又攞嚟講？我唔想答有定冇，唔同嘅時間、唔同嘅心情做唔同嘅嘢，呢二十幾年來我送咗好多樓畀唔同嘅員工，呢個係事實。」
大劉又表示該名前女記者亦知道有雜誌會報道她的事，他說：「我暫時未有時間同佢討論呢件事，今日我都未同佢通過電話。我聽到嘅消息，係本雜誌會將佢唔再做傳媒份工作，同我拉埋嚟講，或者影到我同佢一齊食晏及喺公司出入。另外連Yvonne（呂麗君）嘅大佬同老竇都俾人跟，對佢已經造成騷擾，我唔想畀呢本雜誌利用，所以向大家先講出來，我亦會搵張Yvonne嘅相畀大家登，等大家都唔好執輸有料交，同時亦可以降低呢單新聞嘅價值，我自願畀大家影，就好似女人咁，自願就好開心，唔願意嘅就大叫強姦救命。」
問到大劉會如何保護目前身為其下屬的前女記者？大劉說：「有需要保護梗係會！話影到我同佢食晏、食早餐，無論影到乜，有冇證據，我都唔會因為咁而避，唔會因為咁影響我嘅生活習慣。如果寫得過份，我當然會採取法律行動，但我相信本雜誌會講到似是而非。
「至於報料嘅人，係『活死人』報料畀『六月飛霜』。不過××都係俾人利用，𠵱家佢有得見吓報都可以生活得好開心。」
問大劉有甚麼話要向報料人說時，他說：「冇啦，講嚟把鬼咩！不過做人要退一步諗，憑良心講，佢都係俾人利用啫！」
後來大劉話題一轉，突然談到某個商人，大劉說：「雖然我個人蠢蠢哋，但係都比某商人醒目好多，我集中做自己嘅生意同埋投資，佢只係小女人、師奶，呢啲嘢對我嘅打擊只係𢱑痕，畀佢咁搞一搞就㷫，咁佢咪撈粗嘢（好着數）！」
大劉續說：「我同佢冇積怨，係佢自己放唔開，如果佢搵錢多過我，做嘢叻過我，好過打我一身啦！咁先至係贏嘅感覺，唔係淨係落蒙藥、放暗箭。比起啲人充大頭鬼，我嘅錢真係多好多，你哋資歷深啲嘅都知佢個人係點，食飽冇嘢做先做啲咁嘅嘢，做完最叻唔認。佢冇得改，三歲定八十。」
記者昨日致電訪問前記者陳凱韻，就大劉是否買樓給她及拍拖一事求證，陳凱韻說：「要講同要解釋嘅嘢，劉生已經喺記者會講咗，我亦冇嘢要交代啦！我承認我的確喺劉生公司返工，返咗幾個禮拜。」
採訪：張止寒
攝影：黃文偉、李志明