夏日球驗客:紐記對辦維亞拿最標青

夏日球驗客:紐記對辦維亞拿最標青

新一季英超聯球季又打咗首輪比賽,我求大俠睇過咁多支強隊,發現都係阿仙奴同紐卡素最對辦,特別係「紐記」,佢哋嘅新球員可以話係演出最好嘅。
好似日前「紐記」對韋斯咸嗰場波咁,佢哋身價達八百五十萬鎊嘅葡萄牙中場維亞拿就真係好sharp,重老練到完全唔係十九歲仔。
當然,佢傳中嘅尺寸同受傷嘅羅拔比重差少少,不過假以時日,一定好掂。另外新人掂之外,「紐記」嘅一班年輕球員亦有進步嘅表現,前鋒路亞更梅開二度,但呢名前鋒啲波路幾怪且有啲獨食,冇番咁上下都好難夾到佢。

卡連尼開價高阿仙奴嫌貴
大前日本報先話卡連尼同阿仙奴斟唔掂數,好可能係呢個烏拉圭龍門獅子大開口,原來真係冇錯,英國傳媒話卡連尼要除稅後一萬五千萬鎊(約十八萬二千港元)嘅周薪,若果上陣多過十五場,就要雙倍周薪。呢個價喺今時今日,連富豪球會曼聯都話貴。

訪英帥阿媽《太陽報》跌watt
唔知點解英國《太陽報》喺世界盃之後好似跌晒watt,啲體育新聞愈嚟愈無聊,好似大前日就訪問咗英格蘭國家隊領隊艾歷臣個七十六歲嘅阿媽做底版頭條,話佢好唔滿意曼聯領隊費格遜,因為老費成日同國家隊唔合作。我求大俠真係唔明白,點解《太陽報》要咁九唔搭八問艾歷臣個阿媽呢?