蓮花Elise由於車身輕，加上一台輸出達120匹馬力嘅1.8公升引擎，因而成為賽車場上不少車手嘅「頭號戰車」；不過今日為大家介紹嘅呢部黃色改裝新版Elise，就要來得更厲害，為配合月尾於珠海舉行嘅賽事，特別從英國訂購能令車子馬力輸出增至140匹嘅改裝部品，而且重有機會成為全港至勁嘅新版蓮花Elise㖭。有興趣嘅朋友，就唔好錯過今日嘅介紹喇。
記者、攝影：黃凱穎
車輛提供：TWAutosport（21420001）
從外表睇嚟，呢部改裝新版Elise與原有型號相近，但內裏嘅機械配搭，卻予人有耳目一新之感；原車一台1.8公升直4引擎表現十分稱職，加上有VVT技術嘅輔助，從而令車子低扭時嘅動力輸出增大，起步加速都有不俗嘅表現。但呢部Elise更換上英國TPT全人手打磨及磨光盤頂，馬力輸出增至140匹外，配合上AP-Racing離合器及TPT輕飛輪，起步轉檔反應更見靈敏直接，全沒予人有拖泥帶水之感。
雖然較日本製嘅大馬力跑車還要相差一截，但直路及彎路嘅馬力輸出卻係凌駕於佢哋之上，特別係彎路上嘅加速，出彎時容易控制，加上由於車身較輕，所以加速反應會更強，可予人有駕駛Turbo跑車之感㗎！
除引擎有改動外，就連排氣系統亦改換上LotusSport嘅尾鼓連催化器，不但可解決長時間才進入工作溫度，而產生大量水份嘅問題之餘，馬力輸出及雄渾咆哮聲響更係同級之冠；而呢套LotusSport嘅尾鼓採用鋁化鋼製造，所發出嘅聲響更予人有一份跑車嘅感覺，靜止時沒甚麼特別，只要輕輕踏下油門，來自引擎同尾鼓之間嘅排氣聲便源源湧出，加上排氣及電子系統都包上隔熱布，除能保持排氣系統嘅熱度外，重可以阻隔排氣系統嘅熱力在引擎艙內，同時亦能增加引擎尾段嘅反應同輸出。另外，一套輕量嘅ITG入氣系統更係英國名牌，吸氣率較原裝車大好多，尾段時會有明顯嘅反應。
車上一套制動系統亦有所改動，除改用LotusSport前後煞車碟外，更採用上Brembo嘅迫力皮及迫力鋼喉，因而令其有更出色嘅制動表現；而前後雙搖臂式懸掛組合，輔以四輪高性能輪胎配搭，亦可有助增強路面循迹性，並可有更佳嘅操控表現。