寫字樓租金繼續下跌，但係市道都係無乜起色，過萬呎嘅租務已經當係大手成交。蘭西聽業內人士講，其中一個原因係租客搬遷時，除咗睇租金慳到幾多外，重考慮要幾多裝修費。
唔講唔知，一個普通單位嘅裝修費其實都好揦脷。最近金鐘力寶中心有一個二千方呎單位租出，租客請人裝修，已經唔係豪裝，但聽講要成百萬，每方呎五百蚊。
若果裝修得好啲，價錢又要貴啲，一千蚊呎冇走雞。照咁樣計，超級大客要租十萬八萬呎，裝修費就要成億。就算係外資大行，今時今日嘅環境，好難向總公司攞成億做裝修，因為唔知點樣先可以賺番嚟。
寫字樓大業主要吸引租客，睇嚟除咗要租金平，重要提供裝修或裝修津貼至得。外圍經濟若果重冇起色，寫字樓大業主都唔知點至搵到租客填滿幢寫字樓。
英格蘭超級足球聯賽又開鑼，係食肆嘅黃金機會，不過就只限於酒吧先有可為。
美聯物業舖位部營業經理何漢明透露，最近一個月錄得五至六宗酒吧承租個案，地點當然離唔開尖沙嘴同灣仔，好似尖沙嘴柯士甸道152號地下，二千五方呎，月租五萬五；灣仔分域街15號，地下七百五十呎，另閣樓五百五方呎，月租四萬蚊。
不過，較特別係土瓜灣譚公道16至26號地下成一千呎舖位，月租兩萬三，租客都係酒吧，點解揀呢度，認真考起，唔通附近多咗外國人住？不過，只要賺到錢，邊度開舖都無所謂。
馬灣珀麗灣同長沙灣泓景臺，日日都有新聞，其他新盤惟有趁空檔先有機會搶番啲曝光率。利嘉閣今日安排廖創興企業董事衞振聲出席飯局，之後就安排專車送大家去九肚山一帶睇豪宅，當然唔少得廖創興嘅皓朗山莊。
今次個飯局係大埔雍雅山房，呢個係當年電影明星常去嘅地方，之前曾傳出話賣盤同會拆咗重建住宅，搞到好多人去緬懷一番。
另外，美聯物業就獲怡華益新委託，負責筲箕灣數碼中心租務，今日開記招介紹一吓。講開怡華益新，當年好出名，係大藍籌公司。但𠵱家就好低調。
美聯禮拜四喺葵芳新都會廣場舉辦「必勝秘笈」大會，請到新地代理執行董事雷霆到場，講講珀麗灣周六開售嘅安排，等千幾個代理可以知道點做。
豪宅租金銀碼較大，成交不算太活躍，屋之島東半山分行經理陳君豪表示，跑馬地大寶閣高層A室，三千三百幾方呎，五房兩廳，全海景，重連兩個車位，剛以全包八萬租出，每呎廿四蚊。
不過，蘭西聽一名發展商講，有時市場發放嘅豪宅租務成交，好似山頂同南區獨立屋，月租二十萬，聽落相當正，但若深入了解就唔係咁值得高興，點解？
因為呢啲客可能以前係住開月租三十萬嘅豪宅，𠵱家降格租二十萬。搞到蘭西聽完都唔知點應對。
新世界屬下嘅富城集團，旗下富城網有限公司，最近攞到房屋委員會兩個新落成屋苑住戶專用網站設計合約，係首家物業管理公司攞到呢類合約。
嗰兩個屋苑係油塘嘅油美苑同油塘邨，共有十六座住宅，約七千伙，估計會有兩萬人使用呢個網頁。
物業管理公司為要增值，近年紛紛拓展業務，呢個潮流真係大勢沒法擋，早日起步就可能着數啲。其他同行認為點呢？
蘭西
電郵地址：