受美股刺激，港股急升，恒指進帳161點，近期最弱嘅和黃（013）大發神威，跳高5.3%，啲和黃Call輪「揦埋」都升三四成，最勁嘅9291，升夠7成，不過成交金額得1球。
好似和黃啲咁嘅升勢，好難捉摸，明日派半年成績表，因住趁公布出貨有回吐，高價追Call輪唔值得，始終溢價過高。股價唔升唔跌，啲Call輪都會跌價。有冒險精神想賭嘅話，應該細細注揀啲和黃Put輪埋手，只不過啲Put輪除咗9249之外，隻隻都唔易買賣，賭長期啲揀9442，明年1月到期，現價70仙，溢價9.1%，槓桿率7.9倍。9249，收70仙，散27%，零溢價，槓桿率7.9倍，比較易買賣，要留意時日無多，下月初夠鐘。
滙豐（005）高見92元，收91.75元，升1.50元。現價剛好係上月最高水平。
滙豐今日除息1.60元，睇怕少咗啲搶息客人市，同時近期升得好急，升破咗仙股風暴前水平，揀滙豐輪炒，又係Put值得諗過Call。
滙豐Put輪9332，跌10仙，收77仙，溢價5.3%，槓桿率11.9倍，係時候短炒。滙豐除息後，隻輪溢價降到3.7%。
章 盛