備受日本及香港車迷追捧嘅本田Fit（即港版Jazz）新一代城市小車，遲吓唔再局限於細車範疇喇！皆因早前廠方經已落實會響嚟緊9月，推出全新Fit1.5型號。雖然賣相跟𠵱家1.3公升型號相近，但廠方就加入有14吋同15吋跑車合金胎軨選擇，而一對明亮頭燈配搭亦加有Xenon車燈選配，就連車尾嘅Fit字樣，當中圓點亦由紅變藍，以識別1.5公升版嘅差異嘛！
然而，新車除一台新開發嘅1.5公升VTEC偈（馬力110匹，扭力14.6kgm）矚目之外，一套7前速CVT半自動波連軚盤+/-按鍵，亦見瞄頭十足，加埋白底圓表設計，又難怪會有咁多車迷為佢着迷嘅。