寫稿之時，有線電視新聞報道貓王皮禮士利逝世二十五周年，歌迷排隊參觀佢嘅故居，於是搵一張貓王CD出嚟，重溫金曲JailhouseRock、HoundDog，聽到渾身是勁，幻想自己回復二十五歲，活力多到可以直落七晚開通宵。
發夢還發夢，實際還實際，做人要睇環境，睇吓自己幾多歲。年輕嘅應該冒啲小風險，追求夢想，冒大風險就係賭博，唔值得㗎。年紀愈大，重博乜嘢噃，留番啲錢去培養仔女成才好過啦。一位讀者陳來函話：「現任公務員，無兒女，老婆亦係公務員，生活安穩，做律師係我夢想，但再讀落去就要辭工，心中十五十六，點算好？」
如果讀者陳係三十歲左右，不妨辭工去博一博，一切順利嘅話，喺三十五歲之前可以得到律師資格，重有一番作為，如果年紀大，四十歲先可以考到律師，未免有時不我與之歎。現時律師行業有兩極化迹象，國際（英美）律師行去香港大學搶人！考試名列前茅嘅，二三年班就會簽聘約，畢業後月薪三至四萬，恨死一啲月入六千嘅大學畢業生。但係本地中小型律師樓生意不景，律師破產，時有所聞，所以讀者陳要立大志至得，如能下定決心，精鋤法律，鑽研英文去到IELTS第九級，中文當然亦要好掂（包括普通話），咁就辭公務員職去讀書啦，如果認為目前已讀得辛苦，英文冇突破嘅話，不如繼續做公務員享受生活好過。