朱茵同戴辛尉前晚去北角漢寶酒樓出席港台DJ梁奕倫嘅歌迷聚會，梁奕倫話同另一個DJ范振鋒合組嘅「梁奕倫加范振鋒好有好友會」已經有二千幾個fans加入咗。
前晚就有成六百個fans出席活動，支持梁奕倫喺聽日出新碟，佢嘅好朋友朱茵同戴辛尉專登去捧場。
梁奕倫班fans排住隊輪流錫佢，搞到佢鬼咁感動，男人老狗喊晒口，不過佢突然問fans，佢可唔可以咀朱茵？不過朱茵只係肯送個飛吻畀佢就算，朱茵重話：「飛吻夠啦，我費事佢俾人打呀！」唔通佢男友黃貫中會打人？朱茵笑笑口話：「咁又唔係。」
戴辛尉前晚就講番佢老竇戴思聰同陳曉東（東東）嘅瓜葛，佢話：「佢兩個會心照，我老竇幾十歲人，點會呢頭請佢嚟，嗰頭就寸佢呀。佢哋𠵱家唔係日日見，係生疏咗，但東東都有間唔中打電話問候我爸爸媽媽。」
F4成員之一吳建豪日前為台灣節目《我猜我猜我猜猜猜》任嘉賓，重喺現場揀選新歌MV女主角，當參選嘅女仔揀到最後五位時，每人都要同吳建豪即席演對手戲，當佢哋演分手、搭訕同告白時，現場所有女fans都呷晒醋，重尖叫抗議，搞到吳建豪哭笑不得。今次吳建豪選女主角，美少女個個出盡法寶，有人吹長笛，有人跳舞，其中重有個女仔表演金雞獨立，睇到吳建豪目瞪口呆，認真好嘢！
林家棟噚日去新城接受訪問，佢話剛喺大馬剪綵返嚟，賺咗六位數字，不過啲錢唔易賺，剪完綵要應酬食飯，食埋啲熊掌野味，搞到佢好唔慣。家棟又話：「以前去內地重難做，啲老闆請你食狗肉、貓肉，都唔知點算。」家棟話佢嚟緊又要去大馬，因為要出席朋友嘅婚禮。
莫文蔚（Karen）前晚喺機場出現，原來佢啱啱喺台灣工作完返嚟。Karen全身紅色打扮，雖然冇乜點化妝，但佢都好大方咁畀記者影相。Karen話：「我啱啱喺台灣返嚟，遲啲會幫電影《夕陽天使》做宣傳。」
斑斑前排同朋友喺澳門合資開美容顧問公司，前幾日請咗大班好朋友鄭明明、米雪、胡楓等為公司開張剪綵。斑斑嗰日好開心咁話：「今次係我人生新嘅一頁，我覺得𠵱家嘅生活好充實，未來會積極搵錢，至於拍拖方面都唔諗住，所以冇感情生活。」
郭富城前幾日喺日本做完三場個唱，佢最後喺橫濱嗰場騷重差啲喊咗出嚟，話說佢喺完騷前獻唱日文歌《超越時空》，以日文向全場歌迷講：「歌雖然係新，但掌聲依舊，有你哋支持我，更加強我要緊守舞台嘅決心，有時情緒低落」