能夠跨進大學門檻，相信是莘莘學子的期望，應屆中七學生阿雄，今年終圓當大學生的夢想。然而，在阿雄的臉上，卻找不到半點歡顏，因為出身貧困的他，連日來為一筆大學註冊費和學費四出奔波，煩惱不已。
「九月開學之前，要交晒註冊費同上學期學費，夾埋大約二萬二千蚊，𠵱家我問幾個同學湊咗五千元交註冊費，重欠萬幾蚊學費。」阿雄皺着眉板着臉說。
二十歲的阿雄，雖然年紀輕輕，但特殊的家庭環境，令他早熟成長，其母謝女士老懷安慰地謂：「可能佢爸爸唔生性，對我哋唔好，所以阿雄由細到大都好獨立，好發奮，佢成日話大個要做警察，維護法紀，重話要助養孤兒。」
四十五歲的謝女士，早年與染有不良嗜好的丈夫離異，百病纏身的她，與阿雄及十二歲幼子靠着微薄的綜援金維生，生活清苦。「自己身體唔好，幾十種病，骨科、內科、精神科、腦科統統睇勻，冇本事做嘢賺錢，難為咗兩個仔。」
唯一令謝女士欣慰的是，兩名兒子學業成績斐然，尤其是阿雄，品學兼優，在今年高級程度會考中，更考獲不俗的成績，順利升讀香港理工大學，攻讀物理治療學系。「考到梗係開心啦，唔使咁彷徨，但就擔心唔夠錢，心情可以話係悲喜交集。」阿雄苦笑道。
根據社會福利署的綜援政策，綜援連就學開支津貼只適用於就讀高中或以下程度的學生，大學課程並不包括在資助範圍之內，換言之，阿雄來年的一切教育開支均須自行負擔，對經濟緊絀的謝女士來說，可謂雪上加霜。
一臉憔悴的謝女士歎道：「平日我哋幾仔乸已經好慳，佢兩兄弟返學放學都唔敢搭車，寧願慢慢行二十分鐘，我買餐餸都唔可以超過二十蚊，咁嘅情形都係啱啱夠使，邊有可能剩錢，第時冇埋阿雄份綜援，都唔知點算。」
沉默寡言的阿雄只表示：「我諗住申請政府學生貸款資助，但手續要入學後先有得辦，審批又要一段時間，𠵱家問題係，我連第一期學費都冇錢交。」
蘋果日報慈善基金有見阿雄家境清貧，其勤奮向學精神可嘉，遂撥款一萬六千七百二十五元，資助其繳交大學第一期學費。
捐款編號：C0649
暖流熱線
電話：29908688
傳真：23702192
電郵：
網址：