恭喜！恭喜！上星期日外籍警司左禮宜（RobinJamesJolly）個乖乖女左慧琪贏咗個港姐亞軍，成個警隊上下都為阿左sir高興。八方噚日拉衫尾去銅鑼灣警官俱樂部歎茶，見到俱樂部都好識做，特登喺當眼處貼咗左慧琪同港姐冠、季軍合照嘅過膠靚相出嚟，祝賀Victoria（左慧琪嘅洋名）奪得港姐亞軍。
記得決賽個晚，無綫特別安排五強佳麗嘅家人上台打氣，成為當晚嘅高潮，其中鬼佬左禮宜上台嘅時候，用流利廣東話為愛女打氣，重話喺佢心目中，個女永遠係第一名，Victoria忍唔住喊咗出嚟，場面感人。
左Sir以前做過警犬隊，幾年前又做過外地督察協會主席，𠵱家喺訓練部擔任粉嶺警察駕駛學校校長，月入八萬幾，住喺九龍塘公務員宿舍。對於愛女得到港姐亞軍，佢早排同傳媒講，話成家人之前都冇諗過，個女重細，驚佢會喺娛樂圈學壞。不過佢又話女大女世界，自己都好開通，唔會反對佢做戲，重話預咗俾同袍笑。
八方認為，警察公共關係科可以考慮吓日後搵Victoria做《警訊》嘅主持人，肯定令觀眾一新耳目，Victoria可以爭取出鏡機會，做老竇嘅又唔使擔心愛女學壞，一舉三得。
傳真︰2623-9278
電郵︰