香港經濟咁差，個個都話要節衣縮食，但護膚品嘅銷量居然有增無減，可見女士們對護膚品的狂熱程度。既然護膚品咁受歡迎，個個荷包又縮水，小記就介紹卓悅位於旺角嘅特賣場畀大家，等大家慳錢之餘，又可扮靚靚。今次特賣場以Biotherm系列最抵買，部份貨品更以四折發售，此外，重有其他超筍護膚、潔膚產品，記得把握機會，唔好放過自己嘅心水貨品啦！
記者：區佩嫦
攝影：黃子偉
Biotherm的排毒系列是近期熱賣的產品之一，好似呢支以美白及排毒為賣點的美白排毒精華，含水楊酸、麴酸等活性美白成份，能抑制黑色素，同時能促進血液循環，令肌膚呈現通透感，最重要係沒有一般美白產品的油膩感覺，用完皮膚又滑又白，夠晒剔透。
容量：30ml
貨量：約80支
原價：$400
超筍價：$160
對抗香港混濁空氣的保濕排毒乳霜，其結合潤澤配方和天然排毒複合物，能中和肌膚的毒素，改善繃緊兼暗啞的肌膚。搽上面的感覺唔錯，質地幾清爽，而且吸收得好快，最啱乾性肌膚使用，𠵱家平咗咁多，真係要買番支排排肌膚嘅毒素啦！
容量：50ml
貨量：約60支
原價：$320
超筍價：$128
水藍色包裝的D-STRESS紓壓疲倦調理凝膠，專為經常捱夜缺乏睡眠的OL而設，內含豐富的微量鋅元素及多種維他命，質地夠滑，不油不膩，配合短短10分鐘的面部按摩，疲倦兼暗啞無光的肌膚立時回復活力和神采，買定嚟急救肌膚就最好不過。
容量：50ml
貨量：約60支
原價：$320
超筍價：$128
要保持最佳的線條美，呢支保濕身體緊膚露絕對是你的入貨之選。緊膚露含溫泉水、蘆薈、甘油等極佳的保濕成份，為皮膚保濕之餘，又能即時緊致肌膚，令皮膚回復彈性。搽上身後，淡淡的橙香味是身體及嗅覺的最佳享受。
容量：200ml
貨量：約80支
原價：$260
超筍價：$78
講究胸部線條的你，不妨搶購呢支BUSTUP健胸露。健胸露蘊含維他命E及B5，改善胸部的肌膚及線條，令胸部回復堅挺。此外，水狀的質地夠晒幼滑，配上淡淡的花香味道，持之以恒使用的話，着小背心都特別有自信。
容量：50ml
貨量：約48支
原價：$260
超筍價：$104
一提Biotherm，點可以唔介紹Aquasource溫泉保濕清爽凝膠，佢含500公升活性礦泉萃取精華，防止水份流失的同時，亦能為肌膚提供水份，搽上面後感覺又爽又滑，水份感覺極重，難怪會成為皇牌產品。
容量：50ml
貨量：約60支
原價：$280
超筍價：$112
護膚品特賣，點少得人見人搶的SK-Ⅱ護膚品，呢次特賣場就有最啱夏天用嘅全效UV防曬精華，含有維他命E、Pitera活細胞酵素精華等，加上SPF16及PA+的防曬指數，為幼嫩的面部肌膚提供全面的保護，防止色斑及皺紋的形成，最重要係質地夠滑，搽上面後唔覺油膩，加上SK-Ⅱ嘅品牌，必定成為場內搶手貨。
容量：30ml
貨量：約50支
原價：$495
超筍價：$272
人人都話一白遮三醜，要好似天后鄭秀文嘅肌膚咁白，呢支水嫩美白精華乳又點可以唔買呢？美白精華乳含維他命C、Pitera等成份，能深入肌膚的底層，能抑制黑色素的形成，肌膚自然變得白一白，再加上不俗的保濕功能，想肌膚唔滑都幾難！
容量：30ml
貨量：約36支
原價：$520
超筍價：$286
要徹底卸除化妝，不妨試試shuuemura的卸妝油，呢款卸妝油屬日本版，含祖祖巴油、牛油果油等，能徹底卸除化妝、去除面部的角質層，同時能滋潤肌膚，讓肌膚回復嫩滑，最啱乾性至中性的肌膚使用。
容量：125ml
貨量：約60支
原價：$148
超筍價：$68
Dior的護膚品一向深受闊太歡迎，想學闊太的話，不妨搶購呢支化妝水，佢含有蓖麻油、檸檬酸等成份，能徹底清除面部的油脂及污垢，更可紓緩疲倦的肌膚，使面部皮膚回復清新乾淨的感覺，備有適合乾至中性肌膚的柔嫩爽膚水，及任何肌膚適用的清爽化妝水。
容量：200ml
貨量：約共60支
原價：$180
超筍價：$39
今次特賣當然有受OL歡迎的Lancome卸妝水益各位女士，卸妝水含蜜糖及杏仁精華，性質夠晒溫和，能徹底卸除面部的化妝之餘，且能滋潤肌膚，用後皮膚柔軟清新，備有溫和卸妝乳及清柔卸妝乳兩款，而清柔卸妝乳更能清潔眼部化妝，使用夠晒方便。
容量：200ml
貨量：約共80支
原價：$190
超筍價：$48
卓悅特賣場資料
日期：由即日起至8月31日
時間：10:00am-11:00pm
地點：尖沙嘴海防道35-37號海利行地下A及B舖
電話：23751382
＊每款貨品每人限買一件