深圳嘉寶田房地產公司最近高調喺香港、新加坡同內地搞聯合招聘，名額二十個，聽佢哋總經理陳錚講，最高人工係物業管理公司總經理，年薪八十萬元人民幣，重有房屋津貼、保險及有薪年假等福利。
如果用香港慣性理解嘅十三個月糧計，月薪都有六萬一。睇番入職條件，年齡要四十歲以下、擁有MBA兼八年以上物業管理經驗，重要有好好嘅溝通能力同高英語水平。果然一分錢一分貨。
點解咁重手？陳錚話係想深圳嘉寶田花園業主將來可以享受更專業化、更人性化嘅物業管理服務。
總經理職位雖然唔係咁易坐，但重有其他職位可以諗諗，好似會計師、秘書、物業管理主任同園藝管理員等。
呢個聯合招聘廣告上周五登出後，收到三百幾份應徵信，香港有五十幾封，新加坡就有三十幾封，發展商話應徵者嘅資格都不相伯仲。
招聘時間為期一個月左右，發展商會有評核小組去審閱及評選。有興趣就要快手。
樓盤眾多，要市民留下深刻印象，發展商當然要抓緊樓盤獨特賣點，大事宣傳。長實準備推出嘅凱帆軒，位於西九龍填海區，沿海而建，為標榜樓盤八成單位望維港，與新城電台舉辦一個「維港觀賞指數」。由天文台根據資料，報道本港水域能見度，觀賞指數分為四種。該節目昨日由執行董事趙國雄首播，趙生還引用唐朝劉禹錫的《竹枝詞》的「東邊日出西邊雨，道是無晴還有晴」來寓意樓市看似風雨飄搖，其實已見曙光（表）。
政府通過公務員減薪後，各公營機構都紛紛跟隨，但估唔到會禍及樓市。
有發展商向蘭西大吐苦水，話有一對在公營機構任職嘅夫婦，原本睇中該公司嘅樓盤，傾到七七八八，但突然收到通知話要減人工，雖然幅度好細，根本唔影響生活，但就令到兩人置業態度一百八十度轉變，結果打退堂鼓，放棄買樓，就算發展商肯畀多啲優惠都唔制。
今時今日，發展商出盡法寶先吸引到買家入市，但咁就冇咗個客。有咁多公營機構員工都面臨減薪，應該唔止一個發展商遇到相同情況。政府努力要穩定樓市，勢估唔到會因為瘦身而變成打擊樓市。
通縮下樣樣都愈嚟愈平，住宅租售價都唔例外，以前租市區樓，幾千蚊只能租到個套房單位，但今時唔同往日，呢個價錢可以租到一個單位。世紀21最近做咗幾單租務成交，月租五千蚊有找，最平三千五。
黃大仙鳳德道嘅唐樓進安樓，一樓，月租三千五，都有四百五十呎，呎租七個七，唐樓實用率高，所以應該相當好用；如果唔鍾意住唐樓，附近環鳳街鳳寶大廈，低層C室，最近以全包三千五租出，以四百方呎計，呎租唔使八個八。
呢個價錢喺新界都未必有太多單位可以揀，睇祥益地產嘅成交報告，屯門時代廣場E座低層452呎單位，月租3075蚊，但若要租啟豐園高層467呎單位，月租更要3700蚊。
蘭西
電郵地址：