滙豐銀行嘅中期業績，叫做唔錯。其中「理財產品」為銀行帶來不少利潤，左丁山早已寫過，幾位老友睇完，鬧我係唔係入咗滙豐股票，猛咁擦鞋，真係冤哉枉也。
江師奶呢日講古仔畀左丁山聽，聽完就明白滙豐啲理財中心點解咁賺錢。話說上星期四，江師奶早上聽新城財經台，聽到外滙專家趙善銓嘅訪問，話歐羅可以低吸，又聽到電台報價，歐元兌美元做緊零點九七九，一個月息率三厘以上，於是趁得閒無事，立即走去中環，預備將幾十萬港紙定期存款變為歐元。理財中心職員十分好禮貌，招呼周到，令佢賓至如歸，江師奶於是問價，職員講咗港紙兌歐元嘅滙率，江師奶都唔知高定低，於是問：「咁樣即係歐元兌美元等於幾多呀？」職員㩒吓計數機，答：「一點零一八……」江師奶大吃一驚：「喂，我今朝聽電台係零點九八左右喎，幫你買歐元，我咪一定蝕死！咁一個月歐元存款利率呢？」職員答：「一點七五厘。」嘩同三厘相差好遠啫，江師奶話：「唉，怕怕咯，收零點五厘都冇咁勞氣，費事轉咯。」起身鬆人。
江師奶條氣愈諗愈唔順，走到皇九Galleria呢間水靜鵝飛嘅商場行咗一個圈之後，落到去馬路見到美國銀行（亞洲），心念一轉，走入去問吓歐元價，聽到好似係零點九八五。即刻走返出嚟，打電話畀相熟經紀：「喂，入滙豐呀，同我入番六千股。」