楊千嬅在紅館舉行個人演唱會，因為遲開騷及唱歌時走音而遭狂噓。千嬅前晚向台下觀眾哀求不要噓她，又直認自己沒有巨星條件，但希望歌迷可以多多包容。
楊千嬅日前在紅館舉行《楊千嬅萬紫千紅演唱會》，因首場開場前千嬅肚屙遲開騷，唱歌走音兼狂播片，所以被觀眾狂噓。千嬅前晚舉行第三場個唱，其舊愛鄭中基到場探班。
而千嬅亦已接納觀眾的批評，前晚個唱的程序稍有更改，除了提早開場外，亦刪減了播短片的時間。可是不知千嬅是否仍十分緊張，前晚又再次走音，結果又激動得哭起上來。
千嬅前晚在台上表示希望觀眾可以把她的「走音事件」洗底，她說：「我希望可以唱到四、五十歲，我唱咗七年，自問冇巨星條件，但一直有歌迷支持，你哋撐我就得，可唔可以幫我傳出去話我得，我個名上頭條，感覺好似俾人拉咗，驚到不得了。上次演唱會遲開場，我都唱足番，冇欺場，我好努力練歌，雖然唔係唱得好好，我今晚（即前晚）都冇喊咁多。」
千嬅續說：「以前走音走得多，𠵱家冇得洗底，好似岳飛咁成日『莫須有』，我會努力唱落去，你哋（指歌迷）冇走，令我知道自己冇錯，多謝你哋繼續撐我。呢場有少少失手，我真係好攰，希望你哋包容，柏高（經理人黃柏高）一定唔會負資產，我會爭氣，我愛你哋。」
當千嬅安哥時，又呼籲台下的觀眾不要噓，她說：「雖然有瑕疵，做唔到最好，希望你哋鍾意我甩甩哋，唔係我返屋企又喊。」
而千嬅昨日接受港台電話訪問時則說：「呢次我好多謝記者，佢哋鞭策我更努力爭氣，以正視聽。記者無端端讚我先驚。」
此外，陳慧琳（Kelly）前晚在金鐘欣賞新片《飛天小女警大電影》，Kelly早前被指在個唱中咪嘴，她前晚力撐好友千嬅，Kelly說：「我覺得始終係第一場演唱會，都會緊張啲，可能佢未熟習程序，兼顧四面台都好辛苦，希望千嬅繼續努力可以做到一百分。我緊張都會去廁所，平時我做演唱會會小心食嘢，只會喺出場前食三文治。」
採訪：王連連、卓寶花