港股持續牛皮，收10246，跌18點，成交44.5億元。滙豐（005）噚日曾跌破90元，不過有套息基金入市吸納，收90.25，冇升跌。滙豐將於周三除息，每股派1.599元，都算和味。噚日歐洲股市造好，今日可能炒多一轉至除淨。
合和實業（054）最近以4.1億美元提早贖回07年到期債券，再次惹起市場憧憬將有大動作。一般而言，若企業要進行重大行動，除咗要獲得股東同意外，亦要債權人同意，好多時發債條款可能對企業行動有所限制。當企業有大動作，為免受掣肘，而公司又有錢在手，一般都會贖回債券了事。今次市場揣測合和可能私有化，刺激股價大升6.5%，收4.90元。
正中藥業（327）愈升愈有，噚日再升30.7％，收6.8仙，成交多達1934萬元，真係炒得似模似樣。黑客話，正中有中資大水喉撐住，股價重上0.10元只係初步目標，不過今次中資大水喉幫手，無非都係想托高個價，紓緩大股東財政壓力，有錢賺不妨骨水。
生命科技（1180）見過證券界人士後，股價噚日升11.3%，收0.216元。有卜架話公司管理層冇咩嘢講，大部份都係舊聞無新意，難以吸引投資者買入。噚日睇盤路似係圍內人士左手交右手，但成交都有成900萬元，做得幾有誠意。
辰達永安（1189）又傳出主要股東出現財政壓力，股份遭拋售，一度大跌45%。觸發辰達今次大跌，主要因為陳若偉兄弟遭中銀追債9.5億元，咁大條數，市場唔驚就假。不過要留意中策（235）可能到時到候就入市增持。
阿 虎