今年暑假，收得的荷李活西片包括有《未來報告》、《黑超特警組Ⅱ》、《扮嘢小魔星》、《一家之鼠超力仔2》與《狗狗震》，幾乎全是一些超現實、漫畫感重或以小朋友為主導的題材。荷李活的各大製片廠似乎達至了一個共識，所製作的大片全部脫離現實有咁遠得咁遠，或乾脆以卡通片或漫畫英雄為主打。
最近出現了一個新名詞形容這類電影——popcornmovie（爆谷電影）。爆谷電影講究的不是傳世、深度或文學修養，最、最、最重要的是娛樂性。戲院已成為機動遊樂場中的一個項目，觀眾入場睇戲基本上要滿足視聽之娛，觸發官能刺激，所以影片本身要能用盡戲院內之聲畫設備，觀眾才會滿意。要有頂級的聲與畫，即係等於鬥多錢，香港電影就算去劏死牛都唔會夠荷李活片多錢，於是贏面低得很。
改編漫畫成為電影的最大好處是觀眾容易產生聯想與期待感，荷李活投資的大片動輒花費十億港元閒閒哋，所以觀眾的期待感成為電影回本或賺取利潤的基本因素，觀眾聽到話拍《蜘蛛俠》，就會期待睇現代科技點樣令蜘蛛俠揸住條絲喺城市盪嚟盪去；聽到話拍《狗狗震》，就會聯想嗰隻由細陪住自己一齊長大嘅卡通狗點樣同真人結合。
全部拍晒啲唔係人嘅電影，咁咪即係唔拍啲係人嘅電影？唔係唔拍，不過拍嚟做電視劇，因為電視螢幕細，所以唔啱睇特技，最啱係慢慢嗒人情味。