辰達永安（1189）正副主席被中銀追討巨債一事曝光後，噚日股價勁跌27.5%，收2.9仙。
缸湖傳聞話佢哋被人斬倉，但經紀陳就力排眾議，話由頭到尾都係跟隨查理士．陳嘅炒家獲利回吐，令到辰達股價急跌。
自從查理士．陳聯同和黃（013）等入股辰達之後，隻股炒過上10仙樓上，而有關人等嘅成本，都係大約3至4仙左右，缸湖上一早傳出，話佢哋由10仙已經開始沽貨套現，否則隻股唔會有咁大沽壓。
除咗和黃之外，資本策略（497）同百仕達（1168）都有份買入辰達嘅可換股票據，呢批票據嘅行使價係3.2仙。
據了解該批票據已經有一大部份行使咗，並於早排高位沽出，有關人等賺到笑，就算噚日至沽埋貨尾，一樣十分和味。不過，噚日隻股跌到咁殘，唔排除股價今日有機反彈。
慕容小初