走跳舞歌手路線的英皇3T小花之一鄭希怡（Yumiko），以前曾學過七年芭蕾舞，雖然事隔十載，但日前Yumiko再次練舞時，仍能擺出踢腿、豎腳尖及落地一字馬等動作，但她卻有點腳震。
英皇3T小花之一的鄭希怡（Yumiko），一出道便走韓國跳舞天后朴志胤的路線，以勁歌熱舞會觀眾。其實Yumiko自小練舞，她在四歲時被家人安排學跳芭蕾舞，結果Yumiko學足七年，可惜其後沒有再練下去，至今已有十年了。幸而日前Yumiko在尖沙嘴一間舞蹈室隨師重習芭蕾舞時，仍能保持水準。
Yumiko當日在老師的指導下，先試踢腿和一字馬之類的拉筋動作，到老師提點她的舞步時，Yumiko亦可以腳尖翩翩起舞。不過，由於Yumiko已有一段長日子未曾跳過芭蕾舞，故筋骨亦難免不及以前柔軟。
Yumiko事後笑說：「我細個練芭蕾舞，一個禮拜要上三堂，嗰時真係辛苦到喊㗎，做唔到一字馬，老師唔會畀你起身，但咁就反而進步得快。我試過跳到十隻腳趾起晒水泡，但重要繼續跳，所以我印象好深刻，以前我屋企人又要我學書法、水墨畫、打網球，後來我都係覺得讀書緊要，之後咪冇跳芭蕾舞囉。」
事隔十年再跳芭蕾舞，Yumiko不禁笑說：「算係比我想像中好，OK啦，但係都生硬咗啲，我有啲震震哋㗎，有時間嘅話，我會再勤力啲練番。我成日覺得跳芭蕾舞會令人溫柔啲，將來如果有機會，我一定會喺台上表演芭蕾舞，畀啲新鮮感觀眾睇。」
採訪：朱芷瑩 攝影：黃文成
場地提供：Onestowatch
化妝：AndyLeung（HairCulture）
髮型：Mike&Marco（Headquarters）