愈來愈多香港人假日喜好戶外活動，連帶相關嘅RV亦見大行其道；當中，鈴木Jimny一直受時下年輕用家追捧，皆因佢賣相Cute有型之餘，重有出眾嘅越野性能，家陣代理為促銷關係，售價依舊但就多送全車電鍍配件，自然倍添有多一份吸引力啦！
記者、攝影：陳偉林
新車售價：$139,900
車輛提供：香島汽車（23320091）
鈴木Jimny唔算係新車，但至今仍見有一定支持率，皆因佢除咗具備全天候嘅越野性之餘，小巧吸引嘅造型，加上普羅用家可支付嘅合理售價，一直不乏買家捧場，而近期代理為刺激銷路，更送出全車電鍍裝飾，令呢部四驅車看來更倍添有多一份High-tech悅目性。
車廂鋪排亦見踏實富剛性，兩排四個獨立座席設計，乘坐空間闊落又多變，從而令尾廂容量倍增之餘，又可以演變成闊大卧鋪。除電窗、電鏡及中央門鎖外，重有原廠冷氣同音響組合，好切合日常代步需要㗎！
雖然Jimny用上一台1.3公升直4DOHC偈，性能表現只屬一般，惟小巧穩紮嘅車架，加上一套4前速自動波連可變嘅四驅裝置，日常市區以兩驅操作夠慳油之餘，遇上較崎嶇嘅山路時，又可以用高扭力四驅行車，完全表現出全天候一面呢！