賭王何鴻燊昨日往中環出席港姐頒獎典禮時，不改妙語如珠風格，大讚港姐冠軍林敏琍的名字諧音money改得好。賭王又謂每次置身靚女群中特別心花怒放，更說這是老友邵逸夫（六叔）給他的養生貼士。
賭王何鴻燊昨日應麗花髮廊集團之邀，出席於中環嘉軒CafeBravo的港姐頒獎典禮，擔任頒獎嘉賓，他偕同三姨太陳婉珍所生的女兒超雲出席。
賭王面對眾港姐，表現心花怒放，他大讚今屆得獎佳麗水準高，賭王說：「前幾年嗰啲佳麗我真係唔識欣賞啦，今年呢幾個呢，樣又靚身材又好，又有學歷㖭，尤其係冠軍林敏俐，個名改得真係好，moneymoney，真係要接近多啲呀。」
賭王昨日在頒獎台上致辭時不忘發揮幽默本色，他說：「俾咁多靚女圍住，個人都後生啲、開心啲，呢個秘訣係阿六叔（邵逸夫）教我嘅。有次我問阿六叔，點解見親佢都咁精神，佢就話，第二個就唔教啦，Stanley（賭王何鴻燊英文名）講你聽啦，唯一嘅秘訣咪要有多啲靚女圍住囉。」再問賭王他這樣說不怕幾位太太覺得他花弗嗎？賭王說：「我啲太太好大方嘅。」
問賭王在歷屆港姐中，哪一位令他印象最深刻？賭王說：「咪林良蕙（七六年冠軍）囉，佢癲癲得得咁，我同佢阿爺重係生意拍檔㖭，不過佢阿爺份人好孤寒嘅，次次嚟探我都係坐電車嘅。」
此外，昨日有報道指大劉劉鑾雄再任父親，準媽咪是曾參選港姐的呂麗君，昨日問一班應屆港姐的看法，她們異口同聲表示不知這宗新聞，冠軍林敏俐及亞軍左慧琪更稱不知大劉是誰。再問她們是否覺得同是參選港姐的呂麗君是飛上枝頭的幸運兒，她們均表示參選純粹為增加人生經驗，並不是一心想結識富豪。而五位出爐港姐昨早亦有往港台，出席新節目《開心日報》首播。